حصلت “كود” على معطيات حصرية بخصوص ما نشرته “ميدل ايست ايز” البارح بخصوص نقل ديبلوماسي غربي بالجزائر لرسالة من المغرب الى الدولة الجارة. الموقع قال باللي الرسالة فيها تحذير للجزائر اما البوليساريو تنسحب من الاراضي العازلة كيف ما هو كاين فاتفاقية وقف اطلاق النار من التسعينات او المغرب غادي يتدخل عسكريا. حسب مصادر “كود” فان الرسالة ما كانتش تهديد لسبب بسيط انه باش تمس مصالح المغرب غادي يتحرك عسكريا٬ ووفق المصدر نفسه فان ما كان ان المغرب اختار صديق مشترك للرباط والجزائر من اوربا باش يبلغ رسالة اشمل٬ فيها ان ما يجمع الدولتين اليوم اكثر من مجرد البوليساريو مصدر “كود” اضاف ان الرباط صادقة في فتح حوار استراتيجي مع الجارة الشرقية فيه مواضيع مهمة جدا لامن هذه الجارة ولامن المغرب طبعا. هاد الشي فيه حسب مصادر “كود” تهديدات القاعدة والحركات الانفصالية فالحدود الجزائرية المالية حيث الجزائر مشى ليها ملف “ازواد” واخا بغات تلعب بيه وكاينة ليبيا للي كيشكل تهديد حقيقي ليهم بلا ما ننساو الدواعش اللي اسمهم الموحدين. يعني المغرب كيكول للجزائر: مستقبلك انتي فهاد القضايا. استفزازات البوليساريو كيضرك انتي حقاش المغرب عارف اش باغي. الجزائر دابا مهددة بحركات احتجاجية كبيرة وحتي المغرب عندو نفس التهديد٬ غير فالجارة الشرقية قبل كانت لفلوس يقدرو يصرفو باش يحيدو هاد الاحتجاجات٬ دابا مع انخفاض اثمنة البترول الدولة الجزائرية ما بقا عندها فلوس وقطاعات التعليم والصحة والسكن غاديين للافلاس وتخصيص ملايير الدولارات ليها كيخلي هاد الدولة بزز منها توقف المساعدات على البوليساريو. لفلوس ما بقاتش الجزائر لمريضة مع رئيس مريض وحكام مخبيين وشعب كل نهار عندو مطالب جديدة فالقطاعات المذكورة غادي يكون فهم رسالة المغرب اللي نقلها الديبلوماسي الغربي. طبعا القضية ديال البوليساريو ماشي بالسهولة اللي كيعتقد البعض. الرئيس ديال الجبهة ابراهيم غالي من الصقور وخدام ضد منطق محمد عبد العزيز٬ حقاش باغي يحرك هاد الملف اللي من 1994 ما تحرك. باغي يحسب ليه التاريخ شي حاجة. هاد الشي علاش خلق استفزازات وتحرشات وغادي يخلقها. هدفو يحرك هاد الملف لذا لجأ اخيرا لهاد القضية ديال الاراضي المحررة. هاد غالي واخا الجزائر محكمة فيه ولكن ماشي مائة بالمائة. للي كيحرك البوليساريو كيعرف باللي عندهم ناس يقدرو يديرو تصرف يشعل المنطقة كلها. الوضع قبل ازمة الاراضي العازلة كان فصالح الجزائر. حقاش كتهدد المغرب ومتحكمة بزاف فالجبهة. دابا التحكم كينقص ومع بداية رحيل عدد من قيادات البوليساريو كيزاد الضغط. ما غاديينش يبقاو حياتهم كلها فهاديك المخيمات. لذا كيناورو بزاف. رسالة المغرب للجزائر هو ان المنطقة ايلى شعلات كلشي غادي تشعل فيه العافية وخاصها تراقب ناسها فالجبهة لان مستقبلها اي الجزائر فهاد المراقبة ماشي فالتحرش
