أحسن مهنة فالعالم هي ربة بيت.. بعد 12 عام ديال الكرفي، أنا شخصيا طلعات ليا الخدمة فراسي. ما كنفهمش أصلا علاش الخدمة موضوع نضال، راه خاص الهدف النهائي لكلا الجنسين يكون هو الهروب من العمل المأجور

بالنسبة للعيالات، الحق فالعمل هو مطلب بورجوازي محظ، و هاد القضية كينساوها الفيمينيستات حيث أصلا باش تكون الإيديولوجية الطاغية عندك هي الفيمينيزم، خاص حياتك تكون مليئة بالامتيازات لدرجة أنه كتخفى على عينيك واحد الحاجة مهمة: النساء الفقيرات من قديم الزمن و هوما تيخدمو. إناث الطبقات الكادحة هوما للي معمرين لوزينات ديال التيكستيل و حقول بطاطا، هوما للي كيخبزو المسمن فالمحلبات مع الستة ديال الصباح و يطيبو الكسكسو فالڭنازة، و هوما للي كيجيو السبت الصباح يديرو لميناج للبورجوازيات للي مافيهمش للي يخصر المانيكير. فاش كتسمع بالنضال من أجل المساوات في فرص الشغل، ما تمشيش غالط، راه ما باغينش يزاحمو البلوريطاريا فالهبهاب ديال الخبز، باغين يوصلو لهاديك 1% ل لي ڭالسة فالمجالس الإدارية ديال الأبناك الكبرى و فإدارة المجموعات الصناعية. بالعربية تعرابت، باغين بزآآآاف ديال الفلوس بأقل مجهود. و الدليل على ذلك، ما عمرنا سمعنا شي فيمينست كتناضل من أجل المساوات فولوج خدمة جميع الزبل أو تسراح القوادس، و ما جاتهمش غريبة أن ڭاع للي ماتو فمناجم جرادة رجال.
و باش يجندو الدريات لهاذ الهدف، تيڭولو ليهم بلاش عليكم من الجواج و الولاد حيث كيعتابروهم طموح متخلف، و تيحمسوهم بلائحات فوربز ديال أغنى نساء العالم العربي و إفريقيا و تيڭولو ليهم “شوفو المغربيات علاش ڭادات، و قراي حتى نتي باش تولي بحالهم”، و ما تيصارحوهمش بالحقيقة للي هي هادوك الميليونيرات يا إما ورثو إمبراطوريات مالية من باباواتهم، يا إما مجوجين برجال أعمال يديهم طوال و تيدخلوهم للحرفة. المهم القضية كيفما حللتيها كتلقا فيها بوقلوة عن طريق الورث أو النكاح. شحال من مغربية بدات فعلا من الزيرو و ولات كتلعب بالفلوس ديال بالصح؟ أنا بعدا ما جاتني حتى شي سمية على بالي. و واخا هاكاك تيبغيو يغرسو ليهم فدماغهم الفكرة أن أي بنت كيفما كانت تقدر توصل لهاد الدرجة ديال النجاح المالي و الاجتماعي إلى كافحات، و هاد الشي مستحيل، خاص الدرية تكون شخصيتها خارقة للعادة باش تولي بحال أوبرا وينفري مثلا.
علاش؟ حيث القدرة على تصوار الفلوس متعلقة بشخصية الإنسان كثر من هي متعلقة بعرق كتافو. علماء النفس كيقسمو عناصر الشخصية إلى خمسة: الانفتاح، الوعي بالواجب، التخالط مع الناس، التوافق و الاضطراب. واحد الدراسة كانت تدارت فميريكان و فيها كانو تابعو متطوعين من وينكونسين من خروجهم من الثانوية سنة 1957 حتى شرفو عام 1992، لقاو بللي الرجال عامة عندهم العداوة (العكس ديال التوافق)، الاستقرار (العكس ديال الاضطراب) و الانفتاح كصفات طاغية فالشخصية ديالهم، و عند العيالات لقاو التوافق و الوعي بالواجب. و لقاو كذلك أن القدرة على ربح الفلوس متعلقة بواش الشخص متوافق ولا عدواني. التوافق ماشي بالضرورة صفة إياجبية، حيث كيعني أنك كتخاف تكعي بنادم و بالتالي مكتعرفش التفاوض مع الباطرون باش يعطيك الصالير للي كيبانليك أنك كتستاهلو. ديك الشي علاش فاش كتكون عندك مديرة و لسبب ما مكتبقاش حاملة فيك الشعرة، عوض ما تجيك نيشان و تجري عليك، كتهلك المادة الرمادية فالجمباز الذهني باش تصلط عليك شي واحد حتى تكره راسك و تقدم استقالتك بوحدك، غير باش فاللخر ما تڭولش عليها قحبة ما كتسواش. و العدوانية ماشي بالضرورة صفة خايبة حيث كتعني بللي عندك روح التنافس و طموح مقود. ديك الشي علاش كتلقى الرجال هوما للي تيتسلقو كثر السلم التنظيمي ديال الشركة. كون كانو العيالات كيتخلصو قل غير حيث المجتمع ماكيحملهش، علاش مالين الشكاير ما كيخدموهمش غير هوما؟ مول الشكارة ما كيتسوقش لشنو عندك بين فخاضك، للي هامو هو واش كتدير خدمتك و بشحال، ويلا تافقتي معاه على صالير قل من معدل السوق، راه بطبيعة الحال ما غاديش يڭول ليك لا حاشا بغيت نعطيك كثر، مسألة منطقية يعني.
محن بعد 12 عام ديال الكرفي، أنا شخصيا طلعات ليا الخدمة فراسي. ما كنفهمش أصلا علاش الخدمة موضوع نضال، راه خاص الهدف النهائي لكلا الجنسين يكون هو الهروب من العمل المأجور، يا إما عن طريق الزواج يا إما بشي مشروع يحقق الاستقلال المادي بعيدا عن تبوزباليت ديال الباطرونا. كيف يعقل أن وحدة كتحلم تخدم فبيرو ما كتشوفوش الشمش و خانز بكثرة بنادم و كتضارب فيه مع القحاب على لاكليم حيث كيطلقو السخون فعز الصيف عوض ما يلبسو حوايجهم، و كيتحكم فيها باطرون خدمتو غير مقابل الكاميرات باش يشوف شحال من مرة كتبول فالنهار، و مني كيوصل الويكاند كتخسر الصالير كامل فالشوبينڭ باش تبرد على الفقصة و ما يجيهاش انهيار عصبي؟ كيف يعقل كيجيها هاد الشي وسيلة للتحرر و تحقيق الذات و ماشي نوع من الاستعباد؟ غير باش ما تڭلسش فالدار و تولي ضحكة؟ بالعكس، فهاد الحالة كيولي الزواج هدف نبيل حيث كيضمن ليك الكرامة. اللهوما الڭلوس فالدار معززة مكرمة و تصيفطي راجلك يخدم عليك و يجيب ليك الفلوس حتى لعندك و لا هاد تمارة الكلاب. بطبيعة الحال، خاص انتقاء راجل يعطيك فلوس بلاما يسيطر عليك و هادا كيبقى موضوع آخر.