إمتى كيسالي النيك و كيبدا الاغتصاب. فاش كتكون شي قضية اغتصاب بعنف دايرة في الصحافة، غالبا تيكونو جوج ديال ردود الفعل. اللولة هي “مايمكنش يديرها، باينة عليه درويش”، و الثانية هي “ولكن راه مشات معاه بخاطرها”

فاش كتكون شي قضية اغتصاب بعنف دايرة في الصحافة، غالبا تيكونو جوج ديال ردود الفعل. اللولة هي “مايمكنش يديرها، باينة عليه درويش”، و الثانية هي “ولكن راه مشات معاه بخاطرها”. الحالة اللولة دواو عليها بزاف ديال الناس وڭاع للي بعقلهم عارفين بللي الوجه للي كيعطيك الإنسان فحياتو اليومية ما عندو تاعلاقة بسلوكو الجنسي. أحسن مثال لهاد الشي هو جيمي صاڢيل، واحد السيد كان محبوب بزاف فبريطانيا حيث كان تينشط برنامج ديال الموسيقى مشهور و كان تيدير الأعمال الخيرية لصالح لأطفال و جمع ملايين الدولارات باش يداويهم من السرطان. هاد السيد كان تيڭول بللي تيعجبو يمارس الجنس على جثت الأطفال فغرف الموتى و كان بنادم تيصحاب ليه غير مطلعها. علاش؟ حيث مايمكنش يديرها، عزاز عليه الدراري الصغار بحال ولادو و كيبدل مجهودات كثار باش يبدل حياتهم للأحسن. حتى مات ف 2011 عن عمر 85 عام عاد عرفو بللي اغتاصب و عذب كثر من 500 طفل و منهم بزاف للي كانو تيتداواو فالسبيطارات للي كان تيزور فإطار أعمالو الخيرية. دابا إلى جبدتي سميتو لشي إنجليزي يقدر يتقايا حيث دابا بالنسبة ليهم جيمي صاڢيل كيجسد الشر كثر من إبليس شخصيا.
ندوزو دابا للحالة الثانية. هاد الجملة ديال “ولكن مشات معاه بخاطرها” سمعناها بزاف فجوج ديال القضايا: ديال سعد المجرد و طارق رمضان. بجوجهم متابعين بتهم الاغتصاب بعنف من طرف نساء مشاو معاهم فاللول بخاطرهم. في نظري بزاف ديال الناس كيفكرو بحال هاكا حيث المجرد و رمضان جايين من مجتمعات كتجرم الجنس إلى تمارس خارج إطار الجواج، و بالتالي أي وحدة مشات معاهم بخاطرها فهي مجرمة كتستاهل أي مصيبة طرات ليها. بحال فاش ولاد الدرب تيتبعو شي شفار و كيبوطوه حتى يموت و فاللخر الشفار ما تيبقى فتاشي واحد حيث أصلا دار فعلة خايبة، وقليل للي تيعتارف بللي خطورة العقاب تتجاوز بزاف حجم الجريمة. كيجينا الجنس بحال شي فقاعة صعيب اختراقها، و للي نجح باش يدخل فيها عندو الحق يدير للي بغا حيث صافي راك دخلتي للحرام، غير فجر الشر ديالك كيفما بغيتي.
فاش شي وحدة كتوافق تمارس معاك الجنس، فهي كتعاقد معاك على الأساسيات للي هوما غادين تمشيو بجوج لشي قنت و غادين تباوسو و تلامسو بينا قيمتي و تفزڭ هيا، و تعراو و تخشي نينو فالوريدة ديالها حتى على الأقل شي واحد فيكم يجيب البليزير. أي حاجة خارجة على هاد الإطار تخضع إلى مناقشة سابقة. إلى بغيتي تضربها، تقجها، تدفل عليها، تعيرها، ولا كيفما ربما دار طارق رمضان بغيتي تجرها لطواليط و تبول عليها، سولها بعدا واش كيعجبها هاد الشي. ماشي تغفلها بتصرفيقة و كوتبي و تخشيه ليها فشي بلاصة للي ماعاجباهاش هي بلاما تشاور معاها. حيث هاد الممارسات ماشي خايبة فحد ذاتها، للي كيرجعها خطيرة هو انعدام الموافقة المتبادلة، الأمر للي كيخلي أثر كبير على النفسية ديال إنسانة بغات غير تنشط معاك و تدوز معاك وقت زوين.
كاين للي كيخلص بنادم باش يخرا ليه ففمو و سوقو هاداك حيث ما مبززها على حتى شي واحد. ولكن إلى دماغك صعيب عليه يستوعب مفهوم التراضي و الموافقة، فهادشي يعني أن ماشي الجنس للي تيقيمو ليك، و لكن الألم و المعانات ديال إنسان ضعيف تيبكي قدامك. إلى كنتي بحال هاكا، دير فينا خير و سير تعالج حيث راك خطر على المجتمع.