ها كيفاش لمخازنية سامحين فلحشيش كيتهرب وكيخورو السياحة فالشمال. أساليب ابتزازية للسياح على شواطئ الشمال

شاطئ كابو نيغرو أحد أشهر الشواطئ بشمال المغرب رجعات فيه واحد السيبة حاميها هو حراميها.
بالامس رصدات “كود”، ظاهرة كتهرب السياح من هاد لمدينة والسبب الرئيسي فيها هو القوات المساعدة لي تحطات تماك باش تحضي لبحر صدقات هي كتحضي السياح باش تجيب منهوم صريف.
فشاطئ كابو نيغرو لي كيجيو ليه السياح فالليل يدوزو وقت فالمقاهي لي على الشاطئ جا واحد لمخازني عند راجل ومراتو وقال ليهم اش كاديرو نتوما هنا بواحد الاسلوب منحط وطلب منهم لاكارط ناسيونال وبدا معاهم فالتحقيق منين جيتو واش كاديرو هنا.
هادشي دارو حقاش سحابليه السيد گالس مع صاحبتو وبغا يبتزو كما قال أحد الاشخاص ل”كود”، حيث صرح بأن المخازنية كيديرو هاد لبلانات يوميا للناس فالليل لي كيجيو يتقهواو هنا.
وأضاف ذات المصدر :” عوض ما يحضيو الزودياكات ديال لحشيش لي كيخرجو بلعرارم من الشمال هوما حاضيين الناس كتجي من مدن بعيدة باش دوز وقيت زوين وكيحگرو عباد الله”.
أحد العاملين بالمقاهي قال ل”كود”، أن لمخازنية ولفو كايديرو هادشي للناس، وهادشي كيهرب السياح وكيقضي على رزق عباد الله، مؤكدا أن لي كايدير الزبايل دبصح كيميكو عليه ومشحال من واحد من الجالية جا مع مراتو كرهوه فالنهار لي جا هنا وهربوه من الشمال، وحتى بنادم يلا جا مع صاحبتو كيگلس محترم ولكن هادو كيهجروه ليه”.
السيد لي وقع ليه المشكل مع لمخازني مارطابش ليهم ومابغاش يسكت وطالب بحضور البوليس باش يديرو محضر بالواقعة سيما كانو كاينين الشهود، هادشي خلا لمخازنية والناس ديالهم يدخلو فالوسط ويبداو يرغبو.
هاد السيبة تتم بعلم قائد المنطقة والباشا لي مكيتحركوش، فالوقت لي الدرك الملكي گاع مكيتدخل، أما لمخازنية فهوما متعنيين بشي واحد ديالهوم وگالسين كيخورو السياحة وكيزيدو يبهدلو هاد لبلاد.