الفرنسيس مرعودين من الشينوا و شركاتهم الجديدة ف افريقيا

هادشي اللي ولات كتدير الصين ف افريقيا خالع بزاف فرنسا اللي اصلا مستعمرة اقتصاديا دول كثير ف غرب افريقيا، داكشي علاش موقع فرانس 24 نشر البارح مقالات كاينتقد فيها مايسميه بالتغلغل الصيني فافريقيا و هادشي كله بمناسبة القمة الافريقية الصينية السابعة اللي مشارك فيها بنعرفة ديالنا
القمة حاضر فيها 53 زعيم افريقي و حتى الامين العام للامم المتحدة غوتيريس، المهم اللي جا ف المقال د الموقع التابع لفرنسا انه كاينة 2500 شركة صينية خدامة ف افريقيا ف جميع المجالات و تساءل مول المقال واش افريقيا فعلا كتستفاد من هاد الشركات بحال الا زعما هاد 70 عام الفايتة د الاحتكار الفرنسي خرج بشي نفع على الدول الافريقية المسكينة اللي حتى عملتها الصعبة كتحطها ف البنك المركزي الفرنسي و اللي كايطبع ليها العملة المحلية.
مول المقال تساءل على نسف الموارد الطبيبعة من طرف الصينيين بحال الا فرنسا و شركتها شيل و اريفيا ف النجير و مالي كتحرتم المعايير الدولية ديال استخراج اليورانيوم و الصيد البحري و النفط و غيره، و اللي خالع فرنسا اكثر حسب المقال ديما ان الصين كتستهدف ايضا التغلغل الثقافي و اللغوي وخا معروف على ان الصين مامسوقاش لهادشي حيث عارفة لغتها صعيبة و بعيدة على المجال الحضاري الافريقي و اللي كايهمها هو البيزنيس اكثر.