الأرصاد الجوية ل”كَود”: الشتا غادي تصب بزاف و الثلج جاي

المديرية ديال الأرصاد الجوية كشفات ل”كود” أن الحالة الجوية العامة ديال بلادنا غادي تيغر فالساعات المقبلة. الحسين بوعابد المسؤول على التواصل فالمديرية قال ل”كود” أنه ابتداءً من يوم غد الخميس غادي يجي اضطراب جوي وغادي يحمل أمطار قوية.
وأضاف بوعباد: “هاد الأمطار غادي تصب فالمناطق الشمالية وتقريبا السواحل الاطلسية ومناطق سايس والمناطق الداخلية وغادي تكون زخات ردعية متعدلة إلى قوية، خصوصا فالسواحل الاطلسية الشمالية فالليلة المقبلة ابتداء من الساعة الثالثة صباحا”.
وزاد الحسين بوعابد موضحا: “يوم الخميس والجمعة خصوصا فمناطق سايس غادي تكون زخات مطرية قوية ومناطق الشاوية والغرب كولها غادي تكون فيها زخات رعدية قوية وهادشي غادي يستمر إلى غاية يوم السبت المقبل، مع انخفاض فدرجة الحرارة وممكن تكون بعض التساقطات الثلجية فقمم الاطلس المتوسط التي تفوق علوها ما بين 2200 متر و2400 متر”.
وأنهى المتحدث تصريحه مع “كود” بالإعلان على أن المغرب غادي يشهد أول اضطراب جوي فهاد الموسم واللّي السبب ديالو هو اقتراب منخفض جوي نحو المغرب خلال الليلة المقبلة وغادي يستمر إلى غاية يوم السبت”.