مصدر رسمي: اعتقال غصن الباطرون ديال “رونو” ماعندو حتى تأثير على مشاريع واستثمارات الشركة في المغرب

اكد مصدر رسمي ل”گود” ان اعتقال كارلوس غصن الرئيس المدير العام، لشركة “نيسان-رونو” عملاق قطاع السيارات، ما غاديش يأثر على مشاريع واستثمارات رونو في المغرب.
كما افاد ذات المصدر ل”گود” ان “رونو” مازال ناوية تضاعف إنتاج الشركة في المغرب ليصل 500 ألف سيارة سنويا، كيف ما ثم الاتفاق عليه خلال لقاء غصن بالملك محمد السادس والوزير مولاي حفيظ العلمي في مراكش اكتوبر الماضي، واضاف مصدرنا: “هادو مشاريع ديال الشركة ماشي ديال شخص واحد”.
ورونو اللي كتملك 80 بالمائة من الشركة المغربية لصناعة السيارات “صوماكا” باغة تضاعف القدرة الإنتاجية ديالها بهدف بلوغ 160 ألف سيارة سنويا من هنا ل2022، وبالتالي غادي ترفع قدرة إنتاجها بالمغرب إلى 500 ألف سيارة سنويا، اللي 340 ألف منها كيتم إنتاجها بمصنع طنجة.
والجدير بالذكر ان شركة رونو كتنتج حاليا بكازا سيارات رونو كونگو، داسيا لوگان وداسيا سانديرو، وفي رونو-نيسان بطنجة كتقوم بتصنيع داسيا لودجي وداسيا دوكر، وكيشتغل بالمصنع 5086 موظف.
و أعلنت السلطات الأمنية اليابانية هاد الصباح، اعتقال اللبناني الأصل والفرنسي الجنسية، كارلوس غصن، بشبهة اختلالات مالية.
وانعكست هاد الانباء على أداء أسهم الشركة في سوق صناعة السيارات، حيث انخفضت أسهم رينو بنسبة 15 في المئة تقريبا.