نديرو شوية لفيكسيون. غاي يمشي حامي الدين للحبس وغادي يستاقل الرميد تتبعها محاكمات بالفساد لشي وحدين فالبي جي دي وتسالي باستقالة بنعرفة

قضية القيادي في العدالة والتنمية عبد العالي حامي الدين اللي تاهمو قاضي التحقيق فمقتل ايت الجيد ب”المساهمة في القتل العمد” قضية كبيرة. فيها امور واضحة واخرى غامضة. هنا ما غادينش نركزو على ما هو قانوني ولكن غاديين نديرو شوية الفيكسيون. نتخايلو اش غادي يوقع.
القضية زلزالات حزب العدالة والتنمية. خلاتو يدير اجتماع استئثنائي للامانة العامة لحزب العدالة والتنمية برئاسة الامين العام اللي هو رئيس الحكومة سعد الدين العثماني. البيان فيه ان الحزب تلقى “باستغراب شديد قرار قاضي التحقيق لدى محكمة الاستئناف بفاس بمتابعة الدكتور عبد العالي حامي الدين المستشار البرلماني من أجل جناية المساهمة في القتل العمد مع سبق الإصرار والترصد وإحالته على غرفة الجنايات بنفس المحكمة وذلك من أجل أفعال سبق للقضاء أن قال كلمته فيها بأحكام نهائية مستوفية لجميع درجات التقاضي مكتسبة لقوة الشيء المقضي به منذ سنة 1993، وصدر بصددها قرار تحكيمي لهيئة الإنصاف والمصالحة يؤكد الطابع التحكمي لاعتقال الدكتور عبد العالي حامي الدين، وبعد أن سبق لنفس النيابة العامة أن أصدرت قرارا بحفظ شكاية تقدم بها نفس الأطراف في نفس الموضوع، وبعد أن سبق لقاضي التحقيق أن أصدر قرارا بعدم فتح التحقيق، وهو ما يضرب في العمق مبدأ أساسيا من مبادئ المحاكمة العادلة واستقرار المراكز القانونية للأفراد متمثلا في مبدأ سبقية البت”
واعتبر ان هاد القرار “شكَّل مسا بليغا بقواعد المحاكمة العادلة وسابقة تهدد استقرار وسيادة الأحكام القضائية وتمس في العمق بالأمن القضائي”. قبل هاد الشي خرج وزير الدولة المكلف بحقوق الانسان مصطفى الرميد بتصريح قال فيه ان هاد القرار “لو قدر له أن يصمد أمام القضاء في مراحله المقبلة فسيكون انقلابا في مسار العدالة في المغرب، وسيؤسس لاجتهاد يمكن أن يؤدي إلى نشر كل القضايا التي حسمها القضاء لينظر فيها من جديد، إلا إذا كان هذا الاجتهاد سيبدأ بقضية حامي الدين وينتهي بها وهو أمر لا تخفى خطورته أيضا”. اعتبر المتابعة “اجتهادا اخرق”. شفتو العافية شعلات صافي.
اش غادي مستقبلا؟ هاد الشي غير تخييل. توقع. فالسياق المغربي غادي يتشد عبد العالي حامي الدين بعد محاكمة طويلة. يمكن يعتاقلوه فالاول ولكن اللي كيبان هو غادي يتشد. لقاو منين يشدوه فقضية تجبد فيها اسمو. انتقاداتو للملكية للحكم للتحكم غادي يسالي.
قبل قبل هاد الشي غادية تخرج الاحزاب السياسية تهاجم البي جي دي حقاش باغي يقحم السياسة فالقضاء. غادي يذكرو باللي مؤسسة النيابة العامة مستقلة عن السياسة وعن الحكومة وباللي اللي داروه وزراء البي جي وخاصة الرميد مس باستقلالية القضاء. غادية تكون بيانات من احزاب مكونة للاغلبية واخرى من المعارضة لهاد الموقف. اول ضربة غادية تكون تجي وراها ضربات اخرى
بعد هاد الشي٬ ونعاودها مرة اخرى هاد الشي غير فيكسون٬ غادي يستاقل مصطفى الرميد وزير الدولة من الحكومة وغادية تقبل استقالتو ماشي بحال اللي ومع مع الوزير لحسن الداودي بعد قضية مشاركتو فاحتجاجات عمال سانطرال حدا البرلمان.
ماشي غير هاد الشي اللي غادي يوقع. العدالة والتنمية كيتسير مدن كبيرة ومتوسطة عددها 19 وشي 12 مدينة اخرى بالاضافة الى جوج جهات. غادية تكون قضايا فساد يتابع بها عمد ورؤساء جماعات من البي جي دي واحزاب اخرى. يعني غاديين يمشيو للحبس ولا يتابعو فحالة سراح فقضايا فساد وسوء تسيير. هاد الشي غادي يخلي عدد منهم ما يترشحش لانتخابات 2121 التشريعية.
ممكن جدا الحكومة ديال البي جي دي بقيادة بن عرفة ما تكملش ولايتها. وحقاش باقي عام ممكن تكون حكومة يقودها مستقل حتى لسنة الانتخابات التشريعية.
حزب المصباح غادي يوصل مطحطح بزاف بزاف للانتخابات التشريعية. ما غادياش تكون مسيرة ولد زروال باش ترجع ليهم الروح. شعب الفايس غادي يكمل البقية لهاد الحزب. وما غاديش يجي الاول فالانتخابات التشريعية المقبلة وغادي يولي بحال اللي فيه الجدام حتى واحد ما يقرب ليه.
هاد الشي غير تخيلناه ف”كود”. نعاودوها غير تخيلنا. فيكسيون يعني