أبوزيد مرة أخرى عور ليها العين: أوريد أكثر تدينا من رفاقه ف المدرسة المولوية و الجالية المغربية كايغيرو دينهم مقابل مساعدات الكنيسة

مرة اخرى ابوزيد الادريسي كايجبد الصداع على راسو على الحركة و الحزب اللي منتمي ليه، السيد كايبين كل مرة انه مكيصلحش للسياسة ولا حتى الدعوة .. من بعد الفضايح و الكذوب اللي كل ساعة كانشر و كتوثق، بحال ان الامريكان بشكل سري كايوثقو ارشيفهم بالعربية، سر مكيعرفوه غير المخابرات الامريكية و ابوزيد، و من بعد وصفه لعالم الفيزياء بأنه حمار ووصفه السابق الامازيغ بالبخل، هاد المرة مشا شارك ف برنامج سميتو ‘ سواعد الاخاء” برنامج د السواعدة كاينشر الوهابية و كايجتمعو فيه ف رمضان فقط اكبر الشيوخ المعروفين بالدجل بحال زغلول النجار و شيوخ منافقين هاهما متشددين هاهما تراجعو بعدما جاءهم أمر الامير بنسلمان على مواقفهم و فتاويهم..
المقريء مشا تما ومايقدرش بطبيعة الحال وهو برلماني مغربي يهضر على الحريات و مجزرة الخاشقجي ولا اعتقال اكبر الشيوخ المعارضين لحكم بنسلمان ولا يهضر على جرائم الجيش السعودي ف اليمن ، بل مشا يشد تعويض صحيح نظير مشاركته ف هاد الخيمة و يتكمش مسبحا بحمد ولاة الامور ، لم لا و والبرنامج كايعرفوه مواليه بانه برنامج ديني على منهاج “اهل السنة و الجماعة”، و اهل السنة و الجماعة ماعمرهم يهزو العين ف ولي الامر وخا يقنل و يذبح..
السيد مشا كايهضر على رواية لحسن اوريد، وخا بدا العربية لقا راسو ف الدقائق الاخيرة كايهضر بالخليجية، استلاب هوياتي ماخلا فيها من تمغرابيت غير هاديك الجلابة اللي لابس..وسط ابتسامات الشيوخ المدجلين الاخرين انطلق كايصبغ و يمدح ف حسن اوريد عى اعتباره مجدد و فيلسوف ومفكر و فين عور ليها العين ملي وصفو بكونه اكثر تدينا من رفاقه..زلة لسان كبيرة ماعرفنا شنو كايقصد بها؟ واش زعما كل اصدقاء الملك ف المدرسة المولوية ماشي متدينين غير اوريد بوحدو اللي واعر و متدين فيهم؟ ولقد كان يصبغ فيه، وهو في الحقيقة يصبغ في نفسه حيث زعما واعر ملي اكتشف رواية، حتى لكنت تظن أن كل العاملين بالسياسة و المحيطين بالملك أمير المؤمنين منغمسين في أمر جلل..
وكل ساعة كايبقا يصبغ ف الامازيغ و يصفهم بالاقحاح ويضغط على القاف و الحاء ، و هادي غير باش يكفر على زلته ملي وصفهم بالبخل و العرق المعين، وهادشي راه ماكيبدل والو من موقفه المخزي و غير العلمي من الامازيغية كقضية ووخا ولات لغة دستورية، السيد مزال كايرج بالنقاش القديم واش لغة ولا لهجة و هادوك الاسئلة و الترهات اللي تنم عن فكر قومجي حقود .
وبغض النظر على ان العديد من النقاد للي كايقولو على اوريد انه متطفل على الادب، كما تطفل و فشل ف مجال التدبير الترابي البسيط ملي كان على رأس عمالة مكناس،ف الرواية اللي فرحان بها ابوزيد كتبقا رواية ومتخيلة وكاتبها ماقالش عليها سيرة ذاتية، ابوزيد اللي عاجبو البزينيس الديني و النموذج الشيخ الميليونير مشا ف التفسيرات ووصف المغاربة اللي كايعيشو بلا اوراق ف اوروبا انهم كايتنصرو بسهولة .السيد غير طالق لسانو على المشارقة اللي ماعرفين تا زفتة، اسي المقريء راه المغربي بلا اوراق ماعمر يغير دينه، الناس كتمشي للكنيسة و هادشي عارفينو الناس اللي ف الميدان، كايمشيو غير لانها تقدم مساعدات غذائية، اللي كايغييرو دينهم راه كتيدوزو من تجارب روحية و فكرية و كايقراو مزيان و كايكونو اقلية كثيرة وسط الجالية المغربية والاكيد ان وضعهم الاجتماعي كايكون احسن من اللي بلا اوراق..
وثانيا يا سي الفهيم، راه عكس ماقلتي تحت الابتسامة د سي زغلول النجار صاحب الاعجازات العلمية، راه الناس القارية و المثقفة ف المسلمين المغتربين راه كتمشي لداعش؟ اوا سير قلب ليها على تفسير.
نصيحة لوجه الله لسي ابو زيد، الوقت راه تبدلات، دابا راه كوكل و ويكيبيديا ولات ف التلفونات،الجيل اللي كان كايتقبل الدجل و الغميق و قال عالم فلاني هادوك الخبيرات راه مابقاوش غادي تخرجو على الشباب اللي مزال مؤمن بهاد الخبيرات..شوف اش وقع لصاحبك عائض القرني ملي بان ف التلفزة مذلول كايعتذر وكايقول انا على دين بن سلمان..
سي بوزيد، انت لا تصلح للدعوة لأنك كذوب وماقريتي الا قليلا.. ولا للعمل السياسي الحزبي فصورك وانت نائم تشخر في البرلمان وغيابك عنه ملأت الأنترنيت، ولا لتكون شخصية عمومية لأنك تطبز لها العين مرة بعد أخرى، ربما خصك تمشي تكتفي بالتدريس، الناس اللي قراو عندك النحو و اللغة العربية و اسم المفعول و المبني للمجهول هما اللي مزال كايشكرو فيك…

الفيديو
الفيديو