حتى فروسيا القاريات كايديو القاريين و الزوينات كايديو الزوينين و لي لاباس عليهم كايديو لي لاباس عليهم و حتى فروسيا الانثى فاش كاتبغي تتزوج و لا تستقر و كاتقلب على الرجل المناسب ليها و للمستوى ديالها!

الميكانيزمات لي كاتحكم علاقة الراجل بالمرا ميكانيزمات عالمية و تاريخية ! ايه حقا تبدلات شوية مع الوقت و لكن مايمكنش قرون ديال التاريخ تمسح فعشر سنين و لا ميات عام.
شنو هوما الحوايج لي كايبغيو أغلب العيالات فالرجال ؟
العيالات كايبغيو الراجل القوي لي غايوفر ليهم الأمان ! و حيت القوة اليوم هي الگرمومة و الأمان اليوم هوا الگرمومة فالعيالات عبر العالم كايبغيو الراجل لي عندو ميمي ! الگرمومة هي لاباز و من بعد كايجيو حوايج خرين ! حيت الوقت تبدلات و اليوم ديك مقولة الراجل ماكايعيبو الا جيبو مابقاتش واردة ! اليوم خاصك تكون لاباس عليك و لا عندك مدخول قار على الاقل ! و بوگوص و نقي و كاتعرف تهضر و كاتعرف تعامل باش تشوف فيك شي بنت محترمة ! ( كانسطر على هاد ” محترمة” خمسميات مرة بستيلو حمر).
و هادشي كاين فالعالم كامل ! فروسيا و المغرب و ميريكان و بوتسوانا ! فينما مشيتي غاتلقا العيالات كايميلو للراجل و لي راجل و نص ! و احسن العيالات و اجمل العيالات و اذكى العيالات كايكونو من نصيب الذكور الاقوياء ! و حيت كولا فول عندو كيالو و كولا زبيية خامجة كايجيب ليها ربي فروج عور ينقبها تانتا لاكنتي بوفري و مقودة عليك و فاتشة معبسة ماتخاف مادهش حيت حقك غايوصلك تالعندك غير هوا غايوصلك على قد جهدك ! خايب غادي خايبة ! مزلوط غادي مزلوطة ! مكلخ غادي مكلخة و كولا كايعطيه ربي على قد نيتو و جيبو و كمارتو.
علاش هاد المقدمة كاملة ؟
حيت بان ليا بلي التصاور ديال شي دراري مغاربة فروسيا مع الروسيات خرجو للواجهة واحد النقاش ساخن بين البراهش و البرهوشات ! صحاب ” غانجيبها روسية” !
و بداو شي اصوات كايخرجو لينا بشي تصاور ديال مغربي و روسية و كايقولك ” شوفو الروسيات ! بوگوصات ! و متواضعات ! و نتوما الموسطاشات ماتيرياليست”
العيالات فالعالم كامل ماتيرياليست آ بعرور ! راه مك كون جاها شي بيزنس مان كبير لاباس عليه و زين و كايعرف يهضر موحالش كانت تحاشيها لداك المگرد ديال بوك و تولد معاه طرف ديال الخرا فحالك.
حتى فروسيا القاريات كايديو القاريين و الزوينات كايديو الزوينين و لي لاباس عليهم كايديو لي لاباس عليهم و حتى فروسيا الانثى فاش كاتبغي تتزوج و لا تستقر و كاتقلب على الرجل المناسب ليها و للمستوى ديالها ! فبلا ماتحاول تخبى أخي المعقد العقد ديالك و الزلط ديالك و الفشل ديالك مورا ديك الهضرة ديال ” المغربيات ماتيرياليست” !
لابدلتي البلاد ماكايعنيش انك غاتجيب مرا احسن من المرا لي كنتي غادي فبلادك ! حيت لاكنتي رجل ناجح فبلادك و زين و كاتعرف تهضر و مستواك المعيشي مزيان راه غادي تاخد خيرة البنات ! و لاكنتي مقودة عليك واخا تمشي تال روسيا غادي تاخد شي وحدة مقودة عليها لي ماداوهاش فيها رواسا لي بعقلهم !
قانون الحياة هوا هادا ! تا فروسيا الطبيبات كاياخدو الاطباء و المحاميات المحاميين و كايخليو البوعارات للبوعارين !