كانحس بلي بالموت ديال أمينة رشيد مات آخر جيل ديال العيالات الأنيقات الصامدات ضد الزحف البوزبالي على التلفزة المغربية ! أمينة رشيد بقات انيقة و جميلة واخا كبرات عكس بزاف ديال المغربيات لي دافينين راسهم بالحياة وسط الدرابل و كارهين اجسادهم و انوتثهم !

ماتت أمينة رشيد ! و حتى سمعت بخبر موتها عاد بديت كانتفكر الادوار لي لعبات و لي تفرجت فيهم ليها فالتلفزة و فالسينيما ! بزاف ديال الناس غايعقلو ليها على دورها فلالة حبي ! فيها الملح و السكار و مابغاتش تموت ! “العوني” … واخا الصراحة فأغلب ادوارها كنت كانحس بالنمطية و لكن كانت كاتعجبني بحاجة وحدة !
أمينة رشيد كانت ” أنثى أنيقة” ! مثال للمرا لي عزيز عليها راسها و جسدها و كاتبغي تتهلا فيه ! و حتى فاش كبرات فالسن و مرضات بقات محافظة على الاناقة ديالها ! ديما لابسة مزيان ! الصاية ! الشابو ! السروال ! القفطان المغربي ! مثال للأصالة و المعاصرة ! ضد فأعداء الحب و الجمال و الأنوثة !
عكس بزاف ديال العيالات المغربيات لي غير كايكبرو شوية كايدفنو راسهم و جسدهم وسط الدرابل و الزيوف و ماكاتولي تعرفها واش غادة و لا جاية ! عكس بزاف ديال الممثلات لي ستسلمو للمد الظلامي فالبلاد ! أمينة رشيد بقات صامدة و محافظة على المظهر الانيق ! بقات انثى واخا فاتت سبعين عام … بقات كاتعكر و تصايب شعرها بروشينگ على حقو و طريقو و تبان في ابهى حلة فالمهرجانات و التظاهرات الفنية و بقات كاتمثل حتى آخر رمق !
ماشي سدات على راسها فالدار و شدات الركنة و حبسات حياتها ! ماسداتش على الجسد ديالها وسط الشراوط و حكمات على راسها بلي صافي سيفيني ! لا كملات و بدعات و عاشت …
أمينة رشيد راها قدوة فبلاد مازال فيها بزاف ديال الناس كايشوفو بلي جسد المرا عورة ! خاصو يتغطا ! و شعرها عورة ! خاصها تتغطى ! فبلاد المرا لافاتت الربعين كايگولو ليها ” شدي الركنة و التسابيح” و كولي القوت و تسناي الموت تاتجي ساعتك ! كاتولي عايشة فحال شي محكوم بالاعدام كاتساين فوقاش يعيطو ليها المقصلة ! لا حياة ! لا لباس زوين ! لا شعر زوين ! لا سفر ! لا استمتاع ! و لا عندها شوية د الزهر كاتبقا غادة جاية للعمرة ! الاكتيفيطي الوحيدة لي تقدر دير بلا مايلوموها لا ولاد لا حفاد لا مجتمع !
أمينة رشيد عاشت بكرامة و ماتت بكرامة ! حيت كرامة المرا بحضورها و شخصيتها و حفاظها على انوثتها رغم المد الظلامي البوزبالي لي مسيطر على التلفزة و الشارع !