سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
آ تصنط آ عريوة ! قاليك تسعين فلميا ديال المرضى فميريزگو (سبيطار بن رشد فكازا) راضين على الخدمات الطبية ! وا شوف البهلان كي داير ! هاد الرقم السبيطارات ديال فرانسا لي فرانسا و ماكايوصلوش ليه
حنان الفاضيلي كادير واحد النوع ديال الكوميديا و كاتقنو مزيان سميتو ” الباروديا” ! كادير راسها مثلا خدامة فدار و كاتجلس فالديكور ديال كوزينة و كاتلبس اللباس ديال خدامة و كاتعكف الدرة ديال حياتي على راسها و تزيرها على جبهتها و تبقا تقلد ليك الشخصية … و غالبا كاتصرع الدور و كاتخريني بالضحك. نفس الاحساس حسيت بيه وانا كانتفرج فالفيديو ديال شي طبيبة فميريزگو ردا على داك الفيديو لي كايضور هاد الايام فالفايسبوك و اليوتوب ديال شي مرا مشات للمستعجلات ديال ميريزگو باش داوا و ماحاشاوهاش ليها و خلاوها ملاوحة… وانا كانتفرج فالفيديو و كانتسنا حنان الفاضلي تبان ! !انقول مع راسي واقيلة غير الفاضلي صرعات الماكياج العفريتة و تقنات الدور عاوتاني ! هاهي غاتسالي و غاتبان باش تقول بلي الحلقة سالات و إلى الحلقة القادمة. الطبيبة بصح لخصات الكليشي ديال ديك الطبيبة المفرنسة لي العربية ديالها معكلة و كاتهضر بالغغغا ! و باينة عليها لاباسون عليها ! و جالسة مع راساتها فبيرو يجري فيه الخيل و كاتبتاسم و كاضحك گاع و كاتقوليك ” راه كلشي بيخيغ و على خيغ فميريزگو ! و الأطباء خدامين على قدم و ساق ! و السكانيغات كاينين ! و الناموسيات متيسعين و المواطنين فغحانين ماخاصهم تاخير” شوية ماغاتقول للمصور دخل دخل آ خويا تسمع الزغاريت بالفرحة فجناح الكسور ! لا زعما كاتشكر المباتة فالحبس ! لا سمعتيها كادوي تشها تهز المرا و الدراري و تمشي دوز الكونجي مفوج فجناح الولادات حدا شي نافسة تشبع غا بنان و رفيسة. ياك آ مادام !! كاتبتاسمي و ناشطة مع راسك ! و قالك كانديرو استطلاعات الرأي فالمستشفى و كايطلع لينا بلي اكثر من تسعين فلميا ديال المرضى راضيين على الخدمات ! شناهوا ؟ اكثر من تسعين فلميا ديال المرضى راضين على ميريزگو و خدمات ميريزكو ! هاو هاو هاو ! ماحشمتي ماراعيتي ! مامرگتي ! واخا تكوني كاتهضري على فال دو گراس آ لالة !! وا فرانسا لي فرانسا ! كاتدار فيها واحد الدراسة كاتنظمها الهيأة العليا للصحة و ماكاتوصلش درجة الرضا د المرضى لتسعين فلميا و دراسة كادار على حقها و طريقها ! كايخليو المريض تاكايمشي لدارو ومورا خمسطاشريوم يسيفطو ليه برية و لا ايمايل و يقدر يجاوب بكل خصوصية بدون مايعرفو الهوية ديالو و الاستمارة مقادينها ناس اختصاصيين فالدراسات و كاتعطيك الحق تقيم بزاف ديال الحوايج فالسبيطار من بينها الاستقبال ديال الموظفين و التعامل ديال الاطباء و حتى الماكلة لي تعطات ليك لانعستي فالسبيطار كادير ليها التقييم ! و طبعا ماكايوصلوش لتسعين فلميا ديال الرضا لي وصل ليها ميريزگو ! ماشي حشومة تمرري المغالطات و نتي طبيبة ؟ اينا دراسة كاديرو و فاشمن ظروف كاديروها و شنو هي التمثيلية الاحصائية ديالها ؟ راه ماكاتهضريش مع الحمير آ دكتورة ! باش تقولي درجة رضا المرضى كاتفوت تسعين فلميا و نتي مبتاسمة !! الوضعية ديال قطاع الصحة فالمغرب معروفة ! عارفها العالم كامل ! المنظمة العالمية للصحة بجلالة قدرها كاتقول فالاحصائيات ديالها بلي مازال خاصنا بزاف باش نقادو قطاع الصحة. حتى المواطن براسو ! غير المزلوط المحفحف گاع لي واصلة فيه للجذر لي كايمشي لعندكم ! الناس كاتخسر الزبابل د الفلوس فالكلينيكات غا باش تستافد من داك المينيموم ديال التعامل البشري. راه ماشي بالكذوب و الدوخان على الوقت غادافعي على ميريزگو! لاكنتي نتي جالسة مفججة مع راسك فالبيرو ديالك هبطي للاستقبال و شوفي ! و تساراي فلي شومبر و شوفي ! الوسخ و الاهمال لي صوروه الناس فالفيديو. راه ماشي مطلوب منك تدافعي على ميريزگو بديك الطريقة الغبية ! و تصوريه كأنه جنة ! كلشي زوين و سعيد و ناشط فحال شي منتجع سياحي. گولي غا لي كاين ! گولي ماعندناش المعدات باش نداويو كلشي ! گولي ماعندناش الاطر الكافية باش نداويو كلشي ! قولي الميزانية ديال القطاع ماكافياش ! قولي تا المرضى ماكايعاونوش الطبيب شي مرات و بلي الجهل و الفقر كايساهمو فالاختلالات! قولي مازال كاينة الرشوة و مازال كاينة المحسوبية و كاينين اطباء كايخدمو من نيتهم وي طبعا كاينين ولاد و بنات الناس ولكن كاينين اطباء ولاد القحاب بينهم و بين قسم ابوقراط سنوات ضوئية! أطباء كايستثمرو فأمراض الناس ! كايبيعو و يشريو فحياة البشر خاصهم يتحاكمو فلاهاي مع مجرمي الحروب ! اطباء جزارة ! و كسابة ! و مقاولين! كايتسركلو بالرونجات و المازيراتيات لي جمعوهم من الدم ديال المرضى و معلقين داك الستيكرز ديال ” طبيب” باش يسطاسيونيو بيه فين مابغاو. گولي لي كاين و زيدي حداها ” و حنا راه خدامين باش نعالجو هاد الظواهر و كانديرو لي فجهدنا …” على الاقل الخطاب ديالك غايكون واقعي ! منطقي ! غايسمعو الواحد و يقول هاد السيدة اوموان محترمة راسها و هضرتها عندها معنى. ماشي داك التخوار ديال العام زين و تسعين فلميا ديال لاساتيسفاكسيو ! راه غير “تيودورو اوبيانغ نگيما” الديكتاتور ديال غينيا للاستوائية آ “الشغيفة” لي كايجيب تسعين فلميا فالانتخابات .
