كاين مناطق كثيرة عندها مؤهلات سياحية كبيرة ولكن منسية.. وللأسف الدولة ولا الإعلام غارق في النمطية ومركز على ان الثلج كاين غير في إفران وكذلك الشمس غير فمراكش، والبحر غير في مارتيل

كل عام من نهار دخلات التلفازة للمغرب فين مايطيح الثلج كيجيبو تصاور إفران ويديرو فيها ميكرو طرورطوار وهي لي كيزوروها المغاربة، لدرجة كبرنا وحنا كنعرفو ان الثلج كاين غير في إفران فقط( أنا شخصيا هادشي لي كنت كنعتاقد فصغري)، وحتى ملي بانو المواقع والانترنيت بقات الحالة هي الحالة الماتريال جديد وكن العقلية قديمة، ديما غير يطيح الثلج يمشيو يجريو لإفران باش يسولو زوار إفران لي غادي يجاوبو نفس اجوبة العام افايت ولي قبلو، عشرات السنين كتدوز وتقول واش شي تطور أو تغيير، مكاين غير ترسيخ وتأكيد الكليشيهات ديال الإلام الرسمي لي خدام بيها منذ عام نوضو تركدو.
بزاف ديال المناطق كيطيح فيها الثلج وكثر من إفران كاع، وكاين مناطق سياحية منسية سبقات إفران فهاد السياحة ديال الثلج ومنها جبل بويبلان نواحي تازة ولي أنا شخصيا مكنتش كنعرف أنه كيطيح فيه الثلج أصلا حتى كنت غادي ليه عبر تازة وأنا نلقى الطريق مقطوعة بالثلج وواحد الطبيعة خيالية، وأنا نرجع وكملت لباب بودير ومنتزه تازكا لي لقيتو مدفون بالثلج وخاوي من الباشار إلا قلة قليلة من ناس المدن لقريبة وخصوصا تازة، الثلج والطبيعة والغابة والعيون ولما كولشي موجود من غير الإشهار السياحي لي مقتاصر على مناطق معينة فالمغرب لا غير، الثلج إفران الشمس مراكش الصحرا وارزازات، الجبال والقرى القديمة بين مراكش ووارزازات، أما باقي المغرب بحال الى غير زايد.
كاين مناطق كثيرة عندها مؤهلات سياحية كبيرة ولكن منسية، وللأسف الدولة ولا الإعلام غارق في النمطية ومركز على ان الثلج كاين غير في إفران وكذلك الشمس غير فمراكش، والبحر غير في مارتيل، عليها كتلقى المغاربة ديما مزاحمين فشي بلاصة من هادو، بينما كاينة بدائل كثيرة ولكن منسية ومهمشة وأهمها جبل بويبلان والمنطقة المحيطة بيه ومدينة هرمومو لي هي أقرب بلاصة ليه وتصلاح تكون منطلق لديك المنطقة، ولكن لأسف هرمومو باقا كتخلص على أخطاء الماضي وكذلك المنطقة المحيطة بيها، ونهار سمعنا بويبلان في الإعلام كانت بسباب مأساة موت راعي والغلم ديالو، أما نسمعوه كوجهة سياحية بمؤهلات كبيرة لي تقدر تروج ديك المنطقة كلها فكنظن هذا نهار بعيد وبزاف.