العنصرية والبسالة والضحك اللي ماشي فمحلو.. سارة أبوجاد مصورة فيديو وسط كلينيك وكتفلا بطفل اسود ودارت بيه برانك.. ودابا نايضة حملة سينيال كبيرة ضدها

اليوتوب في المغرب غادي فالخسران والمقالب الباسلة والحامضة باش بنادم يطلع في الطوندونس ويصور الفلوس لي كتدخل من الأدسانس غادية وكتكثر.
آخر البسالة هي لي دارت سارة أبوجاد لي عندها مليون متابع وكتقدم راسها كمؤثرة وهي نهار ومطال مشفنا منها غير تكركير والكلاخ وحتى فائدة ماكينة. هاد السيدة ولدات ختها في كلينيك وناضت جابت ولد حديث الولادة اسود البشرة ودارت بيه مقلب عنصري، وقالت لراجل ختها هادا هو ولدك وهو استخدم كلام عنصري ودون المستوى وجاوبها ب”هادي عزية مكتشبه لحتى واحد”.
الناس والمعلقين عبرو على رفضهم للتصرف لي شارك فيه طاقم طبي في مصحة خاصة ودارو حملة ديال السينيال ضدها باش الفيديو لي وصل ل 600 ألف مشاهدة يتحيد من اليوتوب.
وفي المقابل أكدو معلقين أنها الا كانت واخدة موافقة أم الطفل الاسمر ماكين حتى مشكل وهادشي في اطار الضحك، ولكن كتبقى قضية العنصرية والهدرة الجارحة لي تقالت فالفيديو.
سارة حيدات اللقطة من الفيديو واخا محطوط في اليوتوب ولي تفرج دابا في 25 دقيقة مغاديش يلقى الجزء بشكل نهائي.
دابا غادي نتسناو النيابة العامة ووزارة الصحة تتحرك، حيث هادشي بزاف..استغلال رضيع والعنصرية.