على من كيضحوا الرجاويين. وقعوا فمحضر رسمي على إجراء ماتش الجديدة فموعدو ومنين وصلوا للجزائر رفضوا يرجعوا باش يحطوا العصبة أمام الأمر الواقع ونساو أنهم غادي يخسرو إلا ما لعبوش.. “كود” عندها المحاضر كاملة

الرجاء البيضاوي منوض روينة هاد ليامات على ماتش الجديدة، لي بغاه يتأجل باي طريقة، بمبرر ان الفريق الأخضر عندو مباراتين متقاربة.
هاد الحايحة، لي دايرة الرجاء غير مفهومة على الاطلاق، لحقاش ممثله رضوان الطنطاوي حضر اجتماع ديال رؤساء الفرق بالجامعة ووقع فمحضر رسمي على عدم تأجيل الماتش ديال الجديدة.
“كود” عندها المحاضر كاملة ديال الرجاء البيضاوي، لي طلب فيها التأجيل، وديال الدفاع الجديدة، لي عبر فيه عن تمسكه بإجراء الماتش في موعده، احتراما لمبدإ تكافؤ الفرص، مع تذكيره أنه سبق ليه خاض 4 ديال الماتشات متقاربة منين شارك في عصبة الابطال، ومحضر اخر ديال العصبة، لي كتؤكد أن الأطراف اتفاقوا على عدم تأجيل الماتش، موقعين فيه كاملين، بمن فيهم رضوان طنطاوي ممثل الرجاء.
العصبة الاحترافية قررت فهاد الاجتماع، لي حضروه جميع الأطراف تقديم ماتش الرجاء والفتح الرباطي، وتم التأكيد على إجراء ماتش الجديدة في موعده المحدد لي هو نهار 7 يناير الجاري.
لكن شنو وقع من بعد، اللي وقع أن الرجاء من وصل الجزائري أعلن أنه ما غاديش يرجع للمغرب حتى يلعب كونتر مولودية الجزائري في مسابقة كأس محمد السادس للأندية الأبطال وشبيبة القبائل الجزائري في مسابقة دوري الأبطال الإفريقية.
باختصار المفيد أن الرجا باغي يحط العصبة الوطنية الإحترافية أمام الأمر الواقع، باش يتأجل ماتش الحديدة، ونسى بلي الممثل ديالو وقع على محضر رسمي.
كل المعطيات والأدلة كتؤكد أن الرجاء ساني على إجراء ماتش الجديدة في موعده المحدد وإذا رفض يلعبو غادي يخسرو طبقا للقانون ديال العصبة الاحترافية والجامعة الملكية المغربية لكرة القدم. وهادشي لي عوالة العصبة الاحترافية ديرو مع الرجاء الا ما ارجع للمغرب باش يواجه الدفاع الحديدي برسم مؤجل الدورة 9 من منافسات البطولة، أي خسارة الماتش وخصم نقطة من رصيده.