گاليك سفيرة الطبخ ديالنا. مغربية تهرس ليها نيفها فمطعم شوميشة فدبي وما عطاتها تعويض ما تسوقات ليها

علمت “كود” ان مغربية مقيمة فدبي بالامارات تهرس لينا نيفها فمطعم باب المنصور المعروف بمطعم شميشة نهار 3 دجنبر اللي فات.
المغربية اللي كتخدم تماك وعندها 36 عام جات نفطر بشهيوات بلادها. دخلات ومشات للحمام وهي خارجة منو٬ تضيف مصادر “كود”٬ ما شافتش جاجة ودخلات فيها. الجاج كان شفاف وما فيه حتى شي علامة تقول للزبناء ردو بالكم كيف كينص على هاد الشي القانون تماك او غيرو من الدول.
السيدة تقصحات ونقلت للصبيطار وعرفات باللي نيفها تعرض لهرس مزودج وخلاها دير عملية جراحية.
المشكلة فمطعم لالة شميشة٬ تضيف مصادر “كود” ان المسؤولين عليه اللي عرفو جنسية المغربية وفراسكم كلشي ما تسوقوش ليها. ما جا عندها حد. فالقانون خاص التعويض لكن لالة شميشة ضحكات على بنت بلادها.
المطعم فراسو كلشي ورفض يدفع التعويض٬ ماشي التعويض النفسي. اللا غير فلوس الصبيطار اللي خلصات بيهم العملية واسبوع اللي ما غادياش تخدم فيها بسباب شهادة طبية.
هادي هي لالة شميشة. المعنية اللي اعتقدات باللي بنت بلادها غادية تعطيها غير حقها ماشي كثر٬ وجدات ملفها باش تمشي للقضاء. دابا شوميشة اللي مصدعانا بسفيرة الطبخ المغربي كتكرفص على بنات بلادها. ونعم السفيرة وصافي