أي واحد مارس الجنس مع قاصر هو مجرم في نظر القانون وخاصو يتعاقب ولكن خاص يتعاقبو أيضا حتى هادوك لي كيروجو للقاصر أن الجنس مع خليجي راه نجاح إجتماعي وكيربح بزاف ديال الفلوس

الإعلام والمواقع الإجتماعية عامرين بعيالات معندهم حتى موهبة ( ربما عندهم ولكن مكتبانس للعموم موجهة للخاصة فقط) ومع ذلك مشهورات غير حيت كاينين في الخليج أو كانو فيه ورجعو لهنا وكيحطو تصاورهم وفيديواتهم ديال الحياة السعيدة في الخليج، وفي الواقع بنات ودراري كثار مشاو للخليج وخرجوا واليديهم وأسرهم من الفقر، والإعلام كيظل يستقبل ويروج لهاد الصورة ديال الجميلة المغربية لي مشات للخليج وعايشة عيشة الاميرات ويمكن ليها تولي موضيل ومغنية وممثلة ومقدمة برامج وأي حاجة كتطلب وجه وبنية حسنة، والمغاربة، ويمكن ليها تدوز بطوموبيلتها فوق راس شي واحد من بعد قصارة مع خليجي وتخلص أسرة الضحية بملينت صحاح وتخرج تعيش الحياة وتدير فيديوات ديال التنمية الذاتية، وطبعا كلنا كنشوفو كيفاش أنصاف مواهب كيمشيو للخليج وكيرجعو فنانة وكيتصورو ليهم كليبات بشلا مال.
في مدينة بحال مراكش فين كيتجاور الثراء الفاحش والبذخ بالفقر والحزقة وقلة شي، ومدينة لي النشاط الأساسي فيها هو السياحة بانواعها، فكيبقى الطريق الوحيد للخروج من الفقر بالنسبة للعديد من الأسر الفقيرة ديال المدينة لي كيشوفوا الثراء وكيخدموه يوميا هو تكبر ليهم شي درية زوينة يتزوجها شي خليجي أو اجنبي، وكذلك حتى للدراري مع الأجنبيات، أما الطرق الأخرى ديال الكسب المشروع مكتخرجش من الفقر للأسف وفاللخر كيلقى بنادم راسو ضرب تمارة حياتو كلها وعاش كي الكلب كيراقب فقط حياة الآخرين، المراكشين كلهم ومعاهم كاع المغاربة عارفين أنه مايمكنش تخدم بنت في معمل ديال الخياطة وتقدر تدير دارها أو طوموبيل أو حتى موطور وتاكل وتشرب كي الناس، هادشي مستحيل تلحقو فهاد البلاد بصالير ديال عامل وحتى ديال موظف نزيه، لذا كيبقى قطاع السياحة والحشيش والقوادة والدعارة أحد أبواب الخلاص، وملي كيشوف الواحد صور هاد النجاح حداه، وكيشوف بنات مشاو للخليج سنوات قليلة ورجعو حلو محلات ديال السبا والصونة وداكشي ديال التجميل وولاو سيدات أعمال لابسات جلابة إيفازي وراكبات فرانج روفر ومشهورات فراه عادي أن بزاف ديال القاصرات والمراهقات يبغيو يدوزو من هاد الطريق السهلة ويتشبعو بهاد القيم .
أي واحد مارس الجنس مع قاصر هو مجرم في نظر القانون وخاصو يتعاقب ولكن خاص يتعاقبو أيضا حتى هادوك لي كيروجو للقاصر أن الجنس مع خليجي راه نجاح إجتماعي وكيربح بزاف ديال الفلوس، حيت مؤخرا غير لي مشات حتارفات فالدوري الخليجي كتجي للمغرب وكتولي دايرة فيها رمز الموضة والأناقة والفن وعارضة ومصممة وتلقى كاع المواقع مكبرين بيها ويستقبلوها ويرسخوها في الذهنية ديال المجتمع كصورة للنجاح، وفي مراكش هادي قديم وعندو جذور، في الأحياء الفقيرة البنت غير كتبلغ وتبدى تترطى كتقوليها مها ” وابقاي تدوري حتى تجيبي ليا شي كرش لالياتك دبرو على راسهم وشراو لواليديهم دار فالمحاميد ونتي مقابلة ليا الزوافرية” هادشي سمعتو بوذني ماشي عاودو ليا شي حد، والدري ملي يكون خارج تقوليه مو سير أنا بغيت تجيني ديتك( زعمة عالله تلاقى مع باربي ولا حاريث مكسيريين يصفيوها ليك ونشد فيك ملينات)، هاد العقلية راه هي لي ناتجة قاصرات كيشاطيو مع الأجانب بكاع الجنسيات لي تخايلهم باش يشريو لواليديهم ساس فالمحاميد ويخرجوهم من الزرايب.