السي بوليف راك كتحلل وتحرم على هواك و فنفس الوقت تهين الشعب المغربي لي عايش غير بالكريدي و تهين مؤسسات الدولة الي كتعمل جاهدة باش تقدم حلول للشباب العاطل

الناس المتخصصين فمجال الابناك التشاركية، فهموا إرادة السلطات النقدية والمالية و حتى البنك المركزي فهاد الإستعجال في تنفيد الإرادة الملكية وإطلاق مشروع “انطلاقة” للهدف ديالو مساعدة الشباب لمعندهومش ضمانات كافية باش يديرو مقاولاتهم و مشارعهم.
من غير مشكل الوقت، راه من الصعب ادماج هاد البنوك لأن آلية اعادة التمويل لكيقدمها بنك المغرب ماكاتوافقش نشاط هاد البنوك (استنادا للتدابير الاحترازية حسب اتفاق بازل 3)، وايضاً فقر المنتجات المالية المتوفرة عندها الي تقدر تزود بها راس المال ديالها بحال الصكوك الي يالله تم ترخيصها من اجل التسويق.
الابناك التشاركية بحال الابناك التقليدية هي ابناك ربحية و عندها منتجات و خدمات كتقدمها للزبناء ديالها، بحال التمويل بالمشاركة. هاد التمويل يقدر يستعمله الشخص من اجل تمويل مشروع ما. الا ان هاد التمويل بالضبط يشكل خطورة للبنك و كتواجه فالتنفيذ عراقيل بزاف. المشكل الي بديهي و واضح هو احتمال فشل المشروع الي تم تمويله، فهاد الحالة شكون غادي يتحمل عبء الخسارة؟ خاصة ان الشباب الي موجه اليه برنامج إنطلاقة شباب معندوش ضمانات.
والي بنك المغرب عارف اش كايدير و لذلك اقحم الصندوق المركزي للضمانات فهاد المشروع الي عنده دور مركزي فنجاح هاد المبادرة.
هاد الصندوق المركزي للضمانات مزال ماعندوش نافذة تشاركية باش يقدر يتعامل مع البنوك التشاركية لان المجلس العلمي الأعلى ،لي هو بمثابة الهيئة التشريعية فكل ما يخص هاد النوع من المصارف و البنوك، مزال محددش قوانين و توجيهات بخصوص الضمانات.
حتال هنا فهمنا سبب غياب الابناك التشاركية من برنامج إنطلاقة الموجه للشباب الي بغى يدير مشاريع و للمقاولات الصغرى.
السيد بوليف عن حزب البيجيدي، وزير سابق، دكتور فالاقتصاد، فضل يقول ان الناس الي كياخدو كريديات والشباب الي معنيين بهاد البرنامج مآلهم جهنم لان هاد النوع من التمويل حرام. يعني انا و انت الي بغينا نحسنو من وضعنا، نشريو دار او طونوبيل او نديرو مشروع راه حرام فحرام.
السيد بوليف راك كتحلل وتحرم على هواك و فنفس الوقت تهين الشعب المغربي لي عايش غير بالكريدي و تهين مؤسسات الدولة الي كتعمل جاهدة باش تقدم حلول للشباب العاطل.
اش قدمتي انت الي سنين وانت فالحكومة بكونك وزير سابق، و اشمن حلول حلال قدمتي للشباب بكونك دكتور فالاقتصاد؟
باراكا من اقحام الدين فأي حاجة فقط من اجل خلق الجدل، غفلونا غير مرة و جيبو شي فكرة او حل لشي اشكالية ولا نفعونا غير بالسكات!!