“الجار المجهول” او كيفاش كيشوف تناقضاتنا المجتمعية الكاتب الصحافي خاڤير اوتاسو

“المفرب. الجار المجهول” كتاب للصحافي الكاتب خاڤير اوتاسو مدير مكتب “ايفي” بالرباط. كتاب مختلف عن كتابات الصحافيين الفرنسيين. ما فيهش ادعاء. فهاد الكتاب اللي دار باللغة الاسبانية٬ بقى خاڤير اوتاسو صحافي. روح الكتاب او عمودو مبني على قصص صحافية مواضيع سبق ليه تطرق ليها خلال اعتمادو فالمغرب.
بحال كتاباتو الصحافية خاڤير اوتاسو كيكتب بمتعة الحكي. كيعاود لينا قصص. منها كيبان لينا كمغاربة هاد البلاد. طبعا هو موجهو لصبليون. للقارىء الاسباني. كيقدم ليهم بلاد قريبة بزاف جغرافيا وثقافيا وتاريخيا ولكن بعيدة بزاف عليهم. كيجهلوها.
هاد النقاش جزء من نقاشات مسكون بيها هاد الصحافي. كيفاش كاين كلشي هاد الشي اللي كيجمعنا بالمغرب وكيبقى غريب علينا وكنبقاو حتى حنا غراب. ف15 شابيتر ديال الكتاب كيشرح الصحافي الكاتب هاد المغرب. من قصة “لمقدم” ودو على دوار الامام اللي كان زعيم الخلية الارهابية اللي ضربات برشلونة ثم قصة فصل القانون الجنائي 475 المغربي اللي ما بقاش. بهاد القانون تزوجات امينة الفيلالي من اللي اغتصبها. هو سماه “تزوج بمغتصبك”. كيهدر فيه على هاد القانون وعلى تناقضات هاد المجتمع
هدر على “ملك من عهد اخر” وعلى “نهار الناطق الرسمي باسم الحكومة المغربية السابق مصطفى الخلفي جبد المكسيك ونوض الصداع مع هاد لبلاد وعلى كيفاش لمغاربة كيمارسو حياتهم الجنسبة فظل مجتمع “حشومة” ومجتمع “الحضية” ربط هادا ب”الاجهاض” وموضوع “الامهات العازبات” وزيد عليهم حتى “التعدد” و”الطفلات اللي ولاو امهات”.
فالمجتمع هدر على هاد النفاق المجتمعي من خلال “الافطار فرمضان” واعتبار ان “الاسلام الدين الوحيد” والامية اللي متفشية فالمجتمع. طبعا كاتب اسباني ضروري يجبد الصحرا “القضية المقدسة” عند لمغاربة. الكاتب سالى كتابو ب”الجار الغريب” للي ما معروفش.
بالنسبة للكاتب هاد الجهل فمعرفة المغرب راجع لهيمنة الفرنكفونيين على النخبة المغربية. هاد الشي علاش خلى فرانسا واخا ما بقاتش المستثمر الاول فالمغرب كتاخد مشاريع كبيرة بحال “التي جي في” واخا اسبانيا عندها تجربة كبيرة
كتاب ما فيهش ادعاء فيه وصف لتحولات مجتمع مضارب على اش من طريق يختارو.
الكتاب مفيد حتى للقارئ المغربي. كيعطيه رأي صحافي كيفاش كيشوف امور كنعيشوها. طبعا كاين نقاش فامور كثيرة فهاد الكتاب وحتى الكاتب كيخليه مفتوح لهاد النوع من النقاش.