جاب الله الزفت مايمكنش إعادة استعماله أما تلقى كاع المناطق النائية فيها غير شانطي واحد كيفرشوه الى كان دايز الملك ويجمعوه يصبحوه فبلاصة خرى بحل لي كيديرو مع النخل

هادي واحد العشرين يوم كنت مشيت لعين سبو منطقة زوينة بزاف خاوية ونقية واخا لما ناقص فيها ولكن محتافظة بالجمال ديالها، جات قرب مدينة المنزل بعيدة عليها بشي ربعطاش كلم تقريبا، فاش كنت غادي لقيتهم كيصلحو بعض المقاطع ديال الطريق بين صفرو والمنزل، العام لي فات كنت دزت من داك الطريق وكانو فيها شلا حفاري خصوصا جيهة واد سبو وفي الدخلة ديال المنزل، ولكن هاد العام لقيتهم كيصلحو فيهم، ولكن غير كتفوت المنزل وتشد الطريق جيهة عين سبو الطريق كتولي مكرفصة وشبعانة حفاري وضيقة ضروري تخرج على الطريق الى تلاقيتي شي حد جاي قبالتك، خصوصا أن الطريق كتعرف حركة غير منقطعة ديال الرموكات حيت كيصاوبو مشروع ديال لما، غير كتضور جيهة عين سبو كتولي الطريق كلها حفاري ومكرفصة وخاصك تحضي والى الى كانت جايا شي رموك من الأحسن تجنب وتوقف حتى تدوز.
ولكن لبارح مشيت لعين سبو وأكثر حاجة أستغربت ليها هي الحفاري لي فالطريق دغية تزفتو وتصلحو والطريق رطابت وزيانت، واه دخلي الشك آش واقع، زعمة يكونوا المسيرين ديال هاد المنطقة جاتهم النفس وناضو يخدمو الصالح العام ويزفتو الطرقان غير هاكاك، شوية كتبان ليا الطريق كلها مزروعة بالرايات ديال المغرب، أواه الراية ديال المغرب وحدة حدا لخرى فهاد لخلا والقفار آش واقع، الطريق كلها رايات بحال عيد العرش فالتمانينات، حتى بقات واحد الكلم او جوج لعين سبو وهي تظهر ليا واحد اللافتة جنب الطريق كترحب بزيارة صاحب الجلالة، داك الساعة عرفت للمرة التانية بعد الألف أنه خاص ضروري يكون الملك داز من شي بلاصة أو معول يدوز منها باش تصلح وترقع أما المواطنين مكاينش لي مسوق ليهم.
فاش كنت راجع بالعشية لقيت الكاميو ديل الجماعة كيجمع الرايات لي جنب الطريق، صافي تسالات الحفلة ماعرفتش واش الملك دار شي زيارة لديك المنطقة او لا ولكن المهم هو أن سكان المنطقة وطبعا حتى زوارها فازو بداك شوية ديال الزفت لي دارو للطريق، جاب الله الزفت مايمكنش إعادة استعماله أما تلقى كاع المناطق النائية فيها غير شانطي واحد كيفرشوه الى كان دايز الملك وغير يدوز ويجمعوه يصبحوه فبلاصة خرى بحل لي كيديرو مع النخل والشجر وحاجات خريين، هادشي كان عادي فالتمانينات ولكن دابا فالافين وعشرين وباقي بحال هاد المنطق وهاد العقلية ديال المسؤولين لي حتى يكون دايز الملك عاد تقاد الطريق وتزوق ويتسدو الحفاري أما المواطن ماساوي بصلة الله يجعلو يطيح فيهم هانية.