أنجع طريقة فهاد البلاد باش تقاد شي حاجة هي يدوز الملك من حداها ويشوفها داك الساعة كيتحرك كولش..وبمناسبة تواجد الملك في فاس فين مكنت كندوز فوق شي حفرة فالشارع كنت كنقول عالله يدوز الملك من هنا

فاس مدينة مخربة ومهملة منسية وكتحس بيها متوقفة في الزمن من غير طبعا أحياء كيكبرو ويضوبلو كل عام إلى أنها كتبقى مدينة تحس بالحسرة عليها الى عرفتيها وعرفتي مؤهلاتها حيت فاس كان يمكن تكون أحسن بكثير مما هي عليه الآن وعندها بزاف ديال المميزات ولكن للأسف مدينة منهوبة وتعاقبوا على تسييرها الفاسدين والنتيجة هي الدخلة ديال كرسيف مافيهاش حفرة وحدة والطريق مقادة والطروطوار نقي بينما الدخلة ديال الفاس كلها رايبة قود من الدخلة ديال السبت كزولة شحال هادي، وشفت مدن صغار ولي صدعونا أنهم مدن هامشية وكانت البنية التحتية ديالهم حسن من فاس على ألف درجة الراشيدية مثلا أنقى من فاس بزاف ومصلوحة كثر منها وعندها دخلة وخرجة محترمة ومصلوحة وحفرة وحدة مكايناش فالطريق، بينما فاس منين ماجيتيها غادي تلقى الطريق رايبة ومحفرة ردوها كلها عبارة على زليليك كبير وصافي.
هاد الأيام الملك كان في ففاس وطبعا الطرقان عمرو بوليس وحركة السير تنظمات وفكاع التقاطعات كتلقى كثر من رجل أمن واقف ومنظم حركة السير على خلاف الأيام العادية، والأغلب البوطوات ديال الضو شاعلين وهادي حاجة نادرة ففاس، كاين شوارع رئيسية وسط المدينة وشهور كثيرة وهي بلا إنارة حتى ولاو عاملات الجنس كيديرو فيهم الطرورطوار بحال شارع ولي العهد واخا حي سكني راقي كان كيبقى الضو فيه مطفي مدة طويلة، هادشي بلا منهدرو على الاحياء الجديدة ولي كلها حفاري سنوات هادي غير السكان لي كيسدو الحفاري بمجهود ذاتي، بحال حي القرويين في طريق عين الشقف لي الأزقة ديال بنسودة شحال هادي حسن منو، علما أنا بنسودة كلها مزفتة دابا بينما القرويين واخا حي جديد ونقي إلا أن الشوارع ديالو بحال الى دايز من وسط النوايل.
هاد الأيام لي كان الملك هنا كنت فين مكندوز من شي حفرة وكتزدح الطوموبيل كنقول في خاطري عالله يدوز الملك من هنا، حيت هادي هي أنجع طريقة فهاد البلاد باش تقاد شي حاجة هي يدوز الملك من حداها ويشوفها داك الساعة كيتحرك كولشي باش يصلحو الكارثة قبل مايطيرو من بلاصتهم، عالله يدوز الملك من الدخلة ديال لوطوروط ويشوف حالة داك الطريق كيف مشقوقة ومهرسة وبقات فيها غير جيهة، عالله يدوز الملك من الطريق الدائرية لي كتدوز على بنسودة وعين الشقف وكتخرج فسيدي حرازم ويشوف حالة ديك القنطرة لي فوق لوطوروط لي شهور هادي وهي محفرة كلها وحركة السير فيها معرقلة يوميا خاصك ربع ساعة باش غير تدوز فوق قنطرة وحتى ملي صلحوها زعمة جابو غير شوية ديال الزفت وعمرو بيه جناب لحفاري، وقبل منها جيهة قنطرة الكزارة والرومبة لي قبالة مرجان وطريق موزار وإفران والدخلة ديال فاس من جيهة طريق صفرو هادشي بلا منهدرو على المدينة لداخل لي حالتها تشفي العادة، وطبعا واخا معندناش نفس الطوموبيل وماغاديش نحسو بالحفاري بحال بحال ولكن والله الى شي طرقان وشي حفاري فهاد فاس واخا تدوز فوق منهم بمايباخ غادي تحس بيها بحال سيكانز، إيوا عالله.