الرقم الاخضر ديال المضاربات غادي يبان ولجنة فيها الداخلية والتجارة والفلاحة لتأمين السوق بالسلعة وضرب المضاربين والشناقة. مصدر ل”كود”: استهلكو راه الخير موجود

علمت “كود” ان الرقم الاخضر اللي كيبلغ على المخالفات وعلى المضاربات اللي كان طلقاتو وزارة الصناعة والتجارة والاقتصاد الرقمي 5757 غادي يتم تفعيلو من بعد. هاد الرقم وفق مصدر “كود” غادي يكون بيد لجنة مكونة من وزارات الداخلية والفلاحة والتجارة والصناعة باش ما يبقاش كل قطاع خدام بوحدو وباش يكون تنسيق وطني وتكون الفعالية يقول مصدر “كود”.
وفي موضوع عندو علاقة بهاد الشي علمت “كود” ان وزارة التجارة تلاقات مع كاع الموزعين وصحاب السوبيريت وسوبير مارشي…. الرسالة كانت واضحة: التبزنيز والمضاربة اللا والاسعار خاصها تكون معقولة بلا زيادة بلا نقصان ولا غاديين تخلصو غالي بزاف. مصدر “كود” قال ان كلشي وعد باش يكون كلشي بلا زيادة.
ووفق مصدر من الموزعين ل”كود” فان الخير موجود. السلعة كثيرة تكفي لاكثر من 4 اشهر فبعض المواد كثر بزاف فمواد كثيرة.
دابا خلية الداخلية والتجارة والفلاحة خدمتها تضرب المضاربين واللي كيرفعو الاسعار وتحارب الفايك نيوز اللي كتطلق وكيكونو المغاربة ضحية ليها.