فايك نيوز. رد بالك.. خبار إصابة مغربي بكورونا فحد السوالم غير كذوب

فيسبوكيون تداولو على نطاق واسع واحد الصورة مفبركة دارت بوم هذي يومين، ديال نشرة الأخبار فقناة العربية، اللي كيقولو فيها فشريط العاجل بللي مغربي تصاب ب”كورونا” فحد السوالم، وهو خبر طبعا عار من الصحة.
وغير بالملاحظة المجردة للتصويرة، بإمكان الإنسان يعرف بللي الكتابة اللي مكتوب بيها الخبار معنهاش علاقة بالخط باش كايتكتبو الأخبار العاجل فالقناة، وكيبان من شكللها بللي الكتابة غير محطوطة فوق الصورة وماشي أصلية.
ومن غير هذشي، المصدر الرئيسي لبحال هذ المعلومات هي الوزارة، اللي خرجات معطيات بشان الإصابات اللي تسجلو والمدن اللي تسجلو فيها، وكيتعلق الأمر بالرباط وسلا وكازا ومراكش وفاس وتمارة وتارودانت وتطوان وخريبكَة ولفقيه بنصالح.
وقناة العربية فالعموم عمرها ركزات على المناطق اللي كيتسجلو فيهم الإصابات، لكن كتهتم باسماء الدول فقط، لأن الجمهور فالشرق الاوسط مغايهتموش بزاف باسماء مناطق مغربية، وهذا كيزيد يأكد ان الخبر مجرد فايك نيوز.