كورونا. بعد نقص عدد المتبرعين بسبب حالة الطوارئ.. رئيس مركز تحاقن الدم ل"كود": كنترجاو الناس تجي تتبرع بالدم حيت بزاف واقفة حياتهم عليه

قال محمد بنعجيبة، رئيس المركز الوطني لتحاقن الدم، بللي كاين نقص كبير فعدد المتبرعين بالدم فالمغرب هذ الأيام، "وهذ النقص فالتبرعات بدا مللي بدا وباء "كورونا"، منذ أيام وعدد المتبرعين نقص، ومن بعد حالة الطوارئ الصحية زاد تفاقم هذ النقص، وصل لدرجة 200 متبرع فاليوم فأقل، وهذا رقم صغير".
وزاد بنعجيبة كيقول، فتصريحو ل"كود"، بللي فعلا "كورونا" فيروس خطير، والمواطنين لازم يتقيدو بالتعليمات باش يواجهوه، لكن "أنا كنطلب الناس اللي خداو رخصة باش يتسخرو أو يمشيو للطبيب او للخدمة باش يستغلوها، ويمشيو 10 دقائق لمراكز تحاقن الدم اللي قريبة منهم، ويتبرعو"، على حد تعبيرو.
وأكد بللي بزاف دالناس حياتهم واقفة على الدم، والناس إلى تبرعو من الممكن ينقذو حياة مجموعة من الأشخاص، حيت كاين اللي حياتو متوقفة عليه، ومايمكنش يعيش إلى ما تزادش ليه الدم.
وكان بنعجيبة تأسف، فتدوينة سابقة ليه، على قلة اعداد المتبرعين بالدم فهذ الفترة ديال حالة الطوارئ، بحيث كان عدد المتبرعين كيوصل ل800 فالنهار، ودابا نقص وولا غير 200.
وكان مركز تحاقن الدم دعا مؤخرا الناس باش يتبرعو بانتظام، واكثر من مرة وحدة فالعام، بهدف تغطية النقص اللي كيعرفو احتياطي مخزون هذ المادة فمجموعة من الفترات.