وزارة الصحة للمغاربة: الكلوروكين فعال وموجود وجربوه الشينوا والميريكان ضد "كورونا فيروس"

دخلات وزارة الصحة على خط النقاش الدائر حول مدى نجاعة مادة "الكلوروكين" و"الهيدروكلوروكين" فشفاء المصابين بفيروس "كورونا" المستجد (كوفيد 19).، واكدات للناس اللي مزال عندهم شك فالنجاعة ديالو بللي هذ الدوا تستعمل فالشينوا وميريكان، والأبحاث أكدات الفعالية ديالو.
وزارة الصحة أكدات، فبلاغ ليها صدراتو لبارح الاربعاء فوقت متاخر من الليل، اطلعات "كود" على نسخة منو، بللي الدوا، اللي تم التعميم ديالو على المراكز الاستشفائية هذي أيام والمديريات الجهوية للصحة، على صعيد المملكة، باش يتستعمل لعلاج المصابين ب"كورونا"، هو دوا معروف، كان كيتستعمل لعلاج الامراض المزمنة والملاريا والتهاب المفاصل والأمراض المناعية، وهذشي تحت مراقبة طبية صارمة لتفادي المضاعفات الجانبية.
وكشفات الوزارة بللي البروطكول العلاجي اللي دار تتعتمد بعد قرار اللجنة التقنية والعلمية للبرنامج الوطني للوقاية والحد من انتشار الأنفلونزا والالتهابات التنفسية الحادة، وبينات بللي كتتوفر على الكفاءة العلمية والتقنية من اساتذة طب وصيدلة وأطر معترف بها عالميا باش تعتمد هذ الدواء استباقيا.
وبينات الوزارة بللي المذكرة الوزارية رقم 22 اللي صدراتها هذي يوماين كتضمن توصيات موجهة لمهنيي الصحة باش يستعملو هذ الدوا فظروف آمنة، من أجل تدبير وطني وعقلاني للمخزون فمختلف وحدات التموين.
وطمأنات الوزارة بللي المصابين بالأمراض المزمنة اللي كيستعملو أدوية "الكلوروكين" بإمكانهم ياخدو هذ الدوا من الصيدليات فابور وبصفة استثنائية، وممكن ياخدوه حتى من المصالح الخارجية للوزارة القريبة من محل سكناهم، بعد الإدلاء بالملف الطبي ديالهم.