مصدر من وزارة الصحة: ها شحال من طبيب مصاب ب"كورونا" فالمغرب

كشف حفيظ الزاهري، مستشار وزير الصحة المكلف بالتواصل، بللي الأخبار اللي كتروج بشأن إصابة 11 طبيب بفيروس "كورونا" المستجد لا أساس لها من الصحة، وبللي الأمر كيتعلق بطبيبين فقط، طبيب تطوان اللي ملتزمش بتعليمات الحجر الصحي بعد ما اكتشف إصابتو بالفيروس، وكانت خرجات عليه الوزارة بلاغ مؤخرا، بالإضافة لطبيب آخر وافد كان فإسبانيا ورجع بحالو لكازا.
وأكد الزاهري، فاتصال مع "كود"، بللي الطبيب اللي رجع من إسبانيا تم الكشف عن إصابتو فالمطار، بحكم أن أعراض المرض كانو باينين عليه، وكانت فيه السخانة، و"بالتالي فهذ الطبيب لم يمارس المهنة بعد عودته، وتم نقله مباشرة إلى المستشفى من أجل الحجر الصحي، ودار التحليلة وخرجات إيجابية، وهو طبيب كينتمي للقطاع الخاص"، على حد تعبيرو.
وكيقول المصدر نفسو بللي الحالتين بجوج وافدة، والوزارة دايرة كل ما فجهدها باش مايتسربش الفيروس للأطر الطبية فالبلاد، حيت كتحرص، على حساب هضروتو، باش الأطباء كاملين فالمغرب يلتزمو بشروط السلامة والوقاية، ويديرو جميع احتياطاتهم باش مايتصابوش بالفيروس، وخصوصا منهم الأطباء اللي كاينين فالمستشفيات اللي فيها المرضى المصابين ب"كورونا"، واللي ضروري كيلبسو البدلات الواقية من الفيروس.
وكيشوف بللي عدد الإصابات فالمغرب كيبقى قليل بالمقارنة مع الدول الأخرى، و"كيمكن لينا نقول أن الوضع لحد الآن تحت السيطرة بفضل المجهودات اللي كيقومو بيها الأطر الصحية والمصالح الأمنية اللي كتسهر على بقاء الناس فالمنازل ديالهم باش ماتنتشرش العدوى".
وتداولو مواقع أخبار متطابقة كتشير بللي عدد الأطباء المصابين بكورونا هو 11 طبيب، 7 فيهم كاينين فكازا بوحدها، وجوج فالرباط، وجوج فتطوان.
وبالنسبة لطبيب تطوان، كانت الوزارة صدرات بلاغ كتقول فيه أنه تم اعتقاله، لأنه مالتزمش بشروط الحجر الصحي واخا عرف راسو مصاب بالفيروس، وجرى 2 عماليات جراحية، وتخالط مع المرضى، وانتحل صفة مولد نساء واخا هو طبيب عام.
وفحدود عصر يومه الخميس، وحسب آخر المعطيات الرسمية اللي صرحات بيها الوزارة، وصل عدد المصابين بفيروس "كورونا" المستجد فالمغرب ل225 حالة، 6 منهم ماتو، و6 تشافاو.