الروائية العالمية روي: شكون فينا يزعم يبوس ولا يركب طوبيس بلا ما يخاف شكون فينا ما ولاش فينا عالم فيروسات وشكون من رجال الدين والكهنة اللي ما يطلبش الله باش العلم يلقى حل راه هاد الفيروس بحال رأس المال العالمي غير هو ما باغيش الربح باغي الانتشار والتوسع

الروائية الهندية ارونداتي روي واحدة من اشهر الروائيات العالميات وناشطة سياسية ومدافعة شرسة عن عالم فيه احترام لادمية بنادم. دارت رواية سماتها "الجايجة بوابة" فيه شهادات لكتاب عالميين على "كوروما فيروس". نصها زوين وذكي وعميق. كتعرف تلتقط. هدرات على كيفاش هاد الجايحة كتهدد وجود بنادم وغادية تخربق بنية المجتمع. الجوع والبطالة والازمات السياسية والاقتصادية غادية تشعل الكراهية ويكثر التمييز ويدزاد الفقر وتنوض الحروب تتوقع هاد الكاتبة المناضلة.
ف"كود" غاديين نترجمو بالدارجة مقطع من مساهمتها فهاد الكتاب.
جزء من هاد النص:
شكون يقدر دابا يخدم عبارة "سرعة البرق" بلا ما يتخلع ويخاف. شكون اللي يزعم ويحس براسو من هاد اللحظة ويشوف لبوانيي دالباب ولا ورقة او كارطونة ولا صندوق دالخضرة بلا ما يتخيل هاديك الكائنات الصغيرة اللي ما كتبانش. ما هي ميتة ما هي حية. مغطية بسطوح كتمص. كتسنى لوجيبة باش تدخل لرياتنا. تلصق فيها.
شكون يزعم دابا ولا حتى يفكر يبوس شي غريب ولا يركب شي طوبيس ولا يرسل ولدو للمدرسة بلا ما يخاف. شكون اللي يقدر دابا غير يفكر بحوايج بسيطة وعادية كانت كتمتعنا٬ بلا ما يدورها فراسو ويحسب الخطر اللي يقدر يجينا منها. فهاد لوقيتة. شكون فينا ما ولاش خبير فالاوبئة والڤيروسات وانواعها وبارع فالاحصاء. شكون منا ما ولات نبي. شكون من العلاما والاطبا ما كيدعيش فالداخل ديالو باش توقع معجزة. شكون من الكهنة رجال الدين٬ ما كيدعيش فسرو٬ باللي ما كاين حل من غير العلم.
حتى وهاد الفيروس مدد رجليه. شكون ما كيتمتعش بزفزفة العصافير فالمدن وما كينشطش باش يشوف الطاوس كيشطح فشانطات فيها غير خلا والقفار وشكون ما كيرتاحش للسكات اللي مغلف كلشي برا.
الفيروس تحرك بحرية التجارة ورأس المال العالمي وفرض على البشار يبقاو فبلادهم وفمدنهم وفخيامهم. غير هو عكس راس المال باغي غير يتوسع وينتاشر وما باغيش يربح
هاد الفيروس ضد كاع حركة رأس المال. ضحك على الهجرة وقوانينها. تفلى على اجراءات اخد البصمة والرقابة الالكترونية. تهكم على كاع انواع تحليل المعلومات. الڤيروس ضرب ضربة قاصحة٬ لحد الان٬ المرفحين ولملايرية والشعوب القوية فهاد الارض. وقف الالة الرأسمالية.
يمكن غير هاد المدة ديال التوقاف غادية تكون كافية لينا باش نتمعنو فهاد الآلة. بعدها نشوفو اش نديرو: واش نصلحوها ولا نقلبو على الة حسن منها.