واش هادو مرجان بعقلهم. كتاصلو بالاذاعات الخاصة اللي عايشة مشاكل باش يديرو ليها اشهارات فابور وصحاب المالكة من المستفيذين من هاد الجايحة

علمت "كود" ان المسؤولين على التواصل ف"مارجان" اتصلو باذاعات خاصة كثيرة وكيطلبوهم بلا حيا بلا حشمة باش يدوزو ليهم اشهارات على اعمال خيرية كيديروها. يدوزو وصلات اشهارية فابور. دابا فوقت الازمة اللي ضاربة كاع القطاعات ومن اهمها قطاع الصحافة بكاع انواعو وفالوقت اللي ما كاينش شي قطاع ربح من هاد الجايحة ديال كورونا بحال امثال مارجان واسيما وكارفور .... نايضين هما طامعين فقطاع كيتوفى.
خاصهم يحشمو على عراضهم. شوهة ووقاحة ان هاد الناس يديرو هاد الشي فهاد الوقت. الاذاعات الخاصة بحال الصحافة الورقية والرقمية مخدمة كثار وما كاينش اللي تخلى على شي حد تقريبا واخا ما كاينش حس الاشهار كيدور٬ وناضت هاد "مرجان" باغية الفابور. واش هادو كيعيشو فين كنعيشو ولا شي كوكب اخر. حقاش كاع العالم عايش هاد الجايحة