لبسالة مع الحقارة. واش وزير الصحة طالق علينا لسانو. كيفاش مسؤول التواصل ف"الصحة" كيهين فالصحافيين وفالمقاولات الصحافية وهو خدمتو مقودة

في الوقت اللي المغرب كامل كيتضامن، وكولشي يد ف يد، من الطبيب للمقدم لنساء ورجال الأمن والجيش والوقاية المدينة والصحافة والكتاب والسياسيين والمواطنين وو، باش يواجهو انتشار فيروس "كورونا"، ناض واحد المسؤول ديال التواصل بوزارة الصحة (كيعتبر راسو محلل سياسي) يتشفا ف المقاولات الاعلامية لي تضررات من أزمة كورونا.
حفيظ الزهري، مسؤول التواصل بوزارة الصحة، لي خلا مسؤوليتو وتفرغ للتدوينات فالفيسبوك، قال :"في الوقت الذي يحتاج المواطن المغربي لجهود الصحافيات والصحافيين لنقل الخبر اليقين بدون شائعات في عز أزمة كورونا .. مع الأسف بعض المقاولات الإعلامية لجأت لسياسة الإقطاع من أجور الصحافيين رغم أنه لم يمر شهر على الأزمة.. هذا أمر مؤسف جدا".
دابا هاد المتخلف قال راه رأي شخصي. كيفاش رأي شخصي وهو مسؤول التواصل فوزارة الصحة. هادا يعني ان وزيرو محرشو يكتب هاد الشي. حقاش باش تكون مسؤول ما كيبقاش الرأي الشخصي فامور كبر منو.
الصحافة والمقاولة الصحافية قادة بشغلها. عارفة اش كيدير ما محتاجاش من واحد بحالك يعلن تضامنو مع صحافييها او يجبدهم. انت اللي كتاخد خدمة على حاجة فاشل فيها. وزارة الصحة فاشلة فالتواصل لانو كاين بحالك. سير تقرا وتتعلم ولا سير فحالك حسن.
حشومة بحال هاد التفاهة تكتب. عطى اوامرو للمؤسسات الاعلامية :"يجب إعادة النظر في مثل هذه الخطوات التي سيكون لها تأثير على المشهد الإعلامي بدون شك".
اييه حنا مبغيناش المقاولات الصحافية تنقص من صالير تا شي حد وبغينا التضامن يكون ولكن راه الصحافيين عندهم نقابة وعندهم المجلس الوطني للصحافة لي كيدير خدمتهم، اش دخلك نتا. اش حرگ شطايطك