المدير الصحة فجهة الرباط سلا القنيطرة ل"كود": تشفاو عندنا 59 حالة بكورونا وماتو 10 وغير 4 اللي فالإنعاش..

قال عبد الله بولمعيزات، المدير الجهوي للصحة فجهة الرباط سلا القنيطرة، بللي هذ الجهة سجلات تحديدا 242 حالة، منني بأن الفيروس حتى لليوم، وسجلات 10 وفيات فقط، و59 حالات للشفاء.
وزاد بولمعيزات، فتصريحو ل"كود"، بللي كاينين 173 ديال الحالات اللي كاتلقى العلاج حاليا فالسبيطارات ديال الجهة اللي كتستقبل مرضى "كوفيد 19″، و4 حالات فقط اللي كاينة فالإنعاش فالجهة كاملة.
وقال المدير الجهوي بللي الجهة عندها 4 مستشفيات كتستقبل المصابين بكورونا، وكيتعلق الأمر بالمستشفى العسكري فالرباط، والمستشفى الجامعي ابن سينا، المستشفى الاستعجالي، والمركز الاستشفائي الإقليمي مولاي عبد الله فسلا، وبللي المستشفيات اللي بقات فالجهة كاملين كتتكلف بالحجر الصحي للحالات المشكوك فيها فقط.
وقال بللي حتى اللي كتتبت إصابتهم بالفيروس فمدن أخرى من غير الرباط وسلا كيتم ترحيلها للمستشفيات الأربع، "بحال فاش كتتبت إصابة شي حد بالفيروس فقنيطرة، كيتم ترحيلو من المستشفى الإدريسي حتى لواحد من المستشفيات اللي ذكرت"، على حساب هضرتو.
وقال بللي دابا فالرباط ولاو 3 ديال المراكز اللي كيجريو التحاليل المخبرية على الفيروس، وكيتعلق الأمر بالمستشفى العسكري والمعهد الوطني للصحة بالإضافة للمستشفى الجامعي اللي ولا يدير التحاليل حتى هو ابتداء من الاثنين اللي فات، هو و5 مستشفيات جامعية أخرى فمختلف ربوع المملكة.