كَاع الفرانسيس اعترفو بالتجربة المغربية فتصنيع الكمامات.. مارين لوبين: المغرب كيصنع 5 مليون كمامة فالنهار وحنا كنصنعو 8 فالسيمانة كاملة

أكدات مارين لوبين، رئيسة الحزب اليميني الجبهة الوطنية في فرنسا، بللي المغرب عندو تجربة رائدة فمجال تصنيع الكمامات لمحاربة فيروس كورونا المستجد، وتفوق على فرانسا فهذشي.
وكشفات لوبين، ف"إيديسيون سبيسيال" على قناة فرانس2، بللي فرانسا كتنتج 8 مليون كمامة فالسيمانة، أما المغرب صبح كيصنع 5 دالمليون ديال الكمايم فالنهار، يعني فالسيمانة غاتجيه 35 مليون كمامة.
وقالت بللي فرانسا خاصها تزيد فالتصنيع وتكسيري قدر الإمكان، حيت 8 دالمليون فالسيمانة هي كمية تافهة وضئيلة.
ومللي بدا هذشي ديال كورونا، بزاف ديال المسؤولين الفرنسيين، فاليمين واليسار، اعترفو بكفاءة المغرب فمحاربة الفيروس، وخصوصا فمجال صناعة الكمامات.
جون لوك ميلانشون زعيم اليسار الراديكالي ففرانسا قال، على قناة "بي اف ام تي في" الاخبارية الفرنسية، بللي خاص الدولة تريكيزيسيوني شركات النسيج ففرانسا، وقال بللي خاص الرئيس الفرنسي إمانويل ماكرون يستفد من التجربة المغربية فهذشي، حيت أقل حاجة كيديرها المغرب هي إنتاج 3 مليون ماسك فالنهار.
ووزارة الصناعة والتجارة أكدات بللي الماسكات، اللي كيديرو غير 80 سنتيم، متوفرين بكمية كبيرة، والتصنيع ديالهم مستمر، والجودة ديالهم مزيانة تحمي جميع الأفراد من فيروس "كورونا"، وأكدات بللي المصنعين اللي مكيحتارموش المعايير التقنية القياسية فتصنيعها غيتعرضو لعقوبات قاسية.