نقيب هيئة المحامين بمراكش برا من كورونا وخرج اليوم من الصبيطار

علن سليمان العمراني، نقيب هيئة المحامين فمراكش، اليوم الجمعة، على الشفاء ديالو من فيروس كورونا المستجد، بعدما تلقى العلاج ديالو فمستشفى ابن زهر هذي تحديدا 23 يوم.
وتأكد العمراني من شفاءو بعدما دار جوج ديال التحليلات على الفيروس وخرجو بجوج سلبيين، وهذشي اللي خلاه يخرج من السبيطار اليوم.
وشكر النقيب دالمحامين فالمدينة الحمرا، فرسالة مفتوحة ليه، الملك محمد السادس بفضل تخصيصو لصندوق تدبير هذ الجايحة، بالإضافة لإقامتو لمستشفيات ثابتة ومتنقلة للمصابين بالفيروس، واتخاذ المطلوب فوقت وجيز.
كيف شكر العمراني، فالرسالة نفسها، وزارة الصحة والداخلية وجميع المسؤولين القضائيين فمراكش وعلى الصعيد الوطني، وخص بالذكر وكيل الملك فابتدائية مراكش، اللي تتبع حالتو الصحية، بالإضافة لمندوب الصحة فمراكش والمديرة الجهوية للصحة ومدير مستشفى ابن زهر وجميع الأطقم الطبية اللي شرفو على الحالة ديالو، من أطباء ومساعدين ومرضى، وقال بللي كان عندهم الفضل الكبير فالشفاء ديالو.
ووجه النقيب تحيتو لرئيس جمعية المحامين، عمر ودرا، وجميع النقباء فمختلف المدن، والمحامين فهيئة مراكش، اللي تخلعو عليه وسولو فيه.
وكان فاللول ديال هذ شهر أبريل علن سليمان العمراني على إصابتو بفيروس كورونا، فتدوينة ليه على الصفحة ديالو الرسمية على الفيسبوك.