شركة المستحضرات الدوائية الحيوية الصينية، "سينوفاك بايوتيك"، اللي خرجات اللولة عالميا لقاح ضد إنفلونزا الخنازير "H1N1″، قالت أنها مستعدة تنتج 100 مليون جرعة فالعام من فاكسان ضد فيروس كورونا المستجد. وواخا لقاحها مازال ماعطاش نتائج حقيقية، فمختبراتها في العاصمة بيكين، "سينوفاك بايوتيك" بدات مراقبة تجارب الفاكسان اللي سماتو "كورونافاك coronavac". وبدات الشركة كتنتج فاللقاحات من دابا، واخا مازال ما كملات الأبحاث ديالها الكلينيكية، حيت كتقول انها حصلات على نتائج مشجعة على القرودا، ودابا قادرة تجربو على المصابين، وفمنتصف أبريل دارت التجارب على 144 متطوع، ولكن لحد الساعة مازال الشركة ما حددات التاريخ اللي غادي تسوق فيه الفاكسان. الشركة كتمنى تتوصل بآخر النتائج على اللقاح فاللخر ديال يونيو، وأهم التجارب اللي مازال كتدرسها الشركة على اللقاح هي واش آمن، وواش قادر يجنب الإصابة بالفيروس بشكل فعال. المشكل هو ان شركة "سينوفاك بايوتيك" صغيرة وصعيب تقدر تصنع وتسوق لقاح للعالم كامل، ولكن اكد مدير الشركة مينگ وينينگ انهم مستاعدين يديرو شراكات. وللإشارة فمنظمة الصحة العالمية أكدات ان فاكسان ضد كورونا غادي ياخد بزاف ديال الوقت ، وتقدر توصل المدة بين 12 حتى ل18 شهر.
