شحال هادي واحد الداعية من وليدات قطر مسمي راسو أبو قندوح القندوحي كان بغا يبدا واحد الحملة ضد التبرج و قاليك آ سيدي كاينصح اخوانو اخواتو باش يستنكرو الباطل و كيفاش هاد الاستنكار ؟ بالكلاكسون ! قاليك لاكنتي واقف فالفوروج و بانت ليك شي وحدة دايزة كلاكسوني عليها ! و اا بان ليك شي واحد مع صاحبتو كلاكسوني عليهم !! و لا بانت ليك شي بوگوصة ضاربة شي ميني كلاكسوني عليها ! مهم السيد بغا عباد الله يحاربو المنكر بالكلاكسون ! شوف الحماق ديال الخراقجية فين كايوصل! و تخايل معايا نتا مجتمع فالقرن الواحد و العشرين لي ماعجباتوش فيه شي حاجة و لا شي حد ينوض يكلاكسوني عليه !هههههه غانوليو عايشين فسبيطار د الحماق ماشي فدولة قوانين و مؤسسات ! و مؤخرا شكون غايخرج لينا بعد سبات عميق ؟ السيهم الشيخصار مول الفيديو ديال الترامي لي قالك آ سيدي فواحد الفيديو " سوقي هوا سوقك و ماتقولش ليا ندخل سوق راسي ! انا خاصني نصحك و خاصني نقوليك شنو دير ! و ماتقولش ليا دخل سوق راسك" و شي هضرة باغي يبرر بيها التدخل فحياة الغير و عدم احترام الخصوصيات! باش كايعجبوك الخراقجية كايعياو مايبغيو يبانو كيوت و زوينين و محتارمين القانون و لكن داك العرق السلطوي لي عندهم لي كايخليهم يتخايلو راسهم احسن ناس فالعالم كايفرشهم ! عاوتاني هاد المرض ديال الوصاية ؟! شكون نتا آ سيموحمد باش دخل فعباد الله و تبغي تمارس عليهم الوصاية ديالك ؟شكونك ؟ من انت ؟ كيفاش سوقك هوا سوقي ؟ باشمن حق باغي تعطي لراسك الحق تدخل فحياة الغير ؟! راه ماكاينش لي خارج على هاد المجتمعات لي كانعيشو فيها اكثر من هاد الوصاية على الدين و الاخلاق و التصرفات د عباد الله ! علاش الخراقجية كاتجيهم صعيبة بزاف يدخلو سوق راسهم ؟ حيت توسامبلومو كايشوفو راسهم واعرين بزاف و عندهم الحقيقة المطلقة و ديك الحقيقة المطلقة باغين گاع الناس يآمنو بيها ! عندهم كاطالوغ ديال الحياة ! فيه ها كيفاش خاص يلبس الراجل ها كيفاش تلبس المرا ! هاكيفاش خاصك تفكر ها فاش تفكر و فاش ماتفكرش ! ها شنو تسمع و شنو تاكل و شنو تشرب ! و باغين كلشي يعيش بداك الكاطالوغ د القرون الوسطى ! آ سيدي انا باغا نعيش فالاختلاف و كانآمن بالاختلاف ! و ماكايديرونجينيش الاختلاف ! باغا نشوف المتدين و اللاديني و الملحد و العريانة و لي دايرة ليميش و لي ضاربة الميني فالزنقة و لي غادي مع مراتو منقبة و لي غادا مع جمها و لي معنق صاحبتو و لي غادي للجامع و لي كايضرب الطاسة ! و لي كايسمع لماهر زين و لي طالق العيوط ! انا باغا نعيش فمجتمع ملون ! مجتمع يحترم الاختلاف ! مجتمع كايتحرك و كايتغير و كايتطور ! ماباغاش انا هاد التصور ديال المجتمع لي كلشي كايعيش فيه وفقا للموديل لي راسمو الشيخصار فمخو و لا ابو قندوح القندوحي لي باغين يتدخلو للناس فاختياراتهم و فخصوصياتهم باسم الدين و باسم النصيحة ! مايمكنش المجتمعات كلها غادية و كاتربي الناس على الاحترام و الاختلاف و التعايش و كلا يدخل سوق كرو و هاد الناس مازال حارنين و حالفين تايردونا كاملين فحال فحال ! كانعيشو بنفس الطريقة و كانآمنو بنفس المعتقدات في خرق سافر للقانون و للدستور المغربي و للتوجه لي راسمو صاحب الجلالة لي قال " هل يقبل العقل السليم أن يكون جزاء الجهاد هو الحصول على عدد من الحور العين؟ وهل يقبل المنطق أن من يستمع إلى الموسيقى ستبلعه الأرض، وغيرها من الأكاذيب؟" المغرب كايرسم لراسو صورة الدولة الحداثية و الناس كاتقاتل باش تعيش فمجتمع اكثر حرية و وواحد باغي يرجعنا للوصاية ديال القرون الوسطى ! ماشي التسطية هادي !
