خاص حراس الفضيلة اللي كايهيجو مشاعر العامة وبينهم اعلامي كيدوز فقناة عمومية هوما لي يتحاسبو

تصريحات رفيق بوبكر فلايف فمجموعة خاصة بالسكايرية، خلات مجموعة من المؤثرين يلبسو لباس حراس الفضيلة وخرجو سهامهم لرميها على الممثل رفيق بوبكر وبانو بمظهر العفاف والتقية وخا ماعرفينش حياتهم الخاصة كدايرة واشنو كمارسو فيها ولي كبقى ماشي شغلنا طبعا، تصريحات رفيق بوبكر ولي مايمكنش الانسان اتفق معاها طبعا لكن كتبقى اراءه الخاصة وعبر عليها فحالة لاوعي وسكر ومايمكنش نحاكموه عليها ونطالبو باعتقاله لانه غايخص الدولة تفتح سجون لكاع السكايرية فالمغرب وتحاسبهم على الهضرة لي كيقولو فحالة السكر ...
هاد التصريحات مايمكنش تطالب باقامة حبال المشنقة للمثل رفيق بوبكر واعدامه فقط الى كان الايمان ديالك هش ويتزعزع على سبة والا فحالة اخرى الى بغينا نستغلو هاد التصريحات باش نبانو اتقياء وحراس فضيلة فعيون العامة، وهادشي لي شفناه فالافتراضي من خلال اصوات مؤثرين من صحاب قانون ورجل اعلام ولي بالمناسبة ماكذباتش عليه كود نهار قالت ليه الكلمة الشهيرة...
هاد الصحفي لي خاص اكون قدوة ووعي الناس على ثقافة التعايش فالبلاد وماينساقش مع التحريض المجاني فقضية تافهة، ناض كيطالب السلطات باعتقال الممثل، هاد الصحفي ولي للاسف كيبان انه جاهل حتى بالاسلام، وكما هو معروف فالدين كان على هاد الصحفي يمشي يقلب على سياق نزول اية } لا تقربوا الصلاة وأنتم سكارى حتى تعلموا ما تقولون { هاد الاية بالاضافة لسبب نزولها ولي معروف ان صحابي لا حاجة لذكر اسمه صلى جماعة مع اشخاص اخرين وكان سكران وحرف القران، طبعا الله ماقالهمش قتلوه ولا شدوه فالحبس، نزلات اية كتطالبهم باش ابعدو من الصلاة حتى يسحاو وعرفو اشنو كيقولو، وكما هو معروف سياق تحريم شرب الخمر جا بالتدريج..
هاد حراس الفضيلة وتجار الدين لي تبلينا بيهم فهاد البلاد واي قضية تافهة كحاولو يهيجو فيها مشاعر العامة لاغراض شخصية ولي للاسف اكون بناتهم اعلامي كيدوز فقناة ممولة نسبة منها من فلوس الدولة، خاص هوما لي يتحاسبو وخضعو لتحقيق لانه عيب انت اعلامي كنشوفوك فالتلفازة وتطلع ماكتختلفش فالراي على مول الفوقية والشيخ سار....