شكون يديها فحالة لمغاربة النفسية. راه 3 شهر ما عارفينش شحال من واحد تزير وشحال جاه اكتئاب وشحال فكر فالانتحار

بزاف ديال الدول دارو برامج لمواكبة تأثير الحجر الصحي على الصحة النفسية و العقلية ديال المواطنين ديالها. كندا على سبيل المثال دارت بوابة تتضمن أداة للتقييم الذاتي باش تحدد مستوى شدة تاثير الحجر على الصحة النفسية المواطنين ديالها. كلتقى مثلا مقاطع فيديو للتوعية و حتى جلسات عبر الهاتف من طرف المهنيين و اصحاب الاختصاص من أطباء نفسيين و مرافقين و هاد الخدمة فابور. حتى من منظمة الصحة العالمية كاتنبه على تأثير الحجر على نفسية الناس و تقدر تلقى فالموقع ديالها بعض النصائح.
اش دار وزارة الصحة ورئيس الحكومة فهاد المجال؟ والو.
قربنا نكملو ثلاث اشهر و بنادم ساد عليه فالدار، هاد شي عندو تأثير على حياة المواطن المغربي من جميع النواحي و لكن عمرنا مافكرنا في الصحة النفسية ديالو. علم الله شحال من واحد تزير، شحال من واحد جاته حالة اكتئاب، شحال من واحد حماق و شحال من واحد كيفكر فالانتحار. الدولة خاصها تاخذ بعين الاعتبار هاد النقطة إلى فكرات تمدد الحجر. راه قربنا نتصطاو و حتى واحد ماسوق لينا.