بعد السبت لكحل بفاس والنواحي بسباب الرعدة: ها كيفاش صبحات الدنيا وها علاش الناس خايفة ترجع العاصفة= تصاور هاد الصباح

بعد السبت لكحل اللّي داز على سكان عدد من المناطق التابعة لجهة فاس مكناس بسباب الرعدة اللي جابت التبروري اللي ضربات لفلاحة وكرفصات السكان٬ مازال كل واحد كيدير الخسائر اللي تكبدها
وكما عاينت "كود" اللّي دارت جولات بأهم شوارع مدينة فاس، طيلة صباح اليوم الأحد، فإن الأجواء مزال غير مستقرة، ومزال كاين رياح قوية تنذر بعودة العاصفة مجددا لهاد المناطق، وخا بانت الشمس شويا، ودفعات بعدد من الناس اللي ديما كيديرو الرياضة يخرجو لأهم شوارع المدينة بحال شارع علال ابن عبد الله وشارع الحسن الثاني.
الحركة رجعات عادية صباح اليوم. عدد من الموظفين والمستخدمين مشاو للخدمة بشكل عادي. بحال البوليس بان خدام وجاي للعمل ديالو فالوقت، وعمال النظافة كانو خدامين على جمع مخلفات الأمطار والعواصف القوية، التي لم تتجاوز 15 دقيقة. سكان هاد المناطق مزال متخوفة حقاش الجو ماشي هو هداك وكاين الريح بزاف والأرصاد الجوية مزال مقالت والو.
وفضلاً على تدمير محصولات زراعية تابعة لجهة فاس مكناس، وخاصة بجبال الأطلسين الصغير والمتوسط، فإن هاد العواصف دكدكات الطُونُوبِيلاَتْ ديال الناس وهرسات النوافذ وخنقات لقوادس اللي مزال فيهوم مشاكل منذ سنوات، وخاصة القوادس لي كاينين قلب المدينة العتيقة لفاس.