الفرنساويين اللي حاصلين فالمغرب: 32 ألف رجعو لبلادهم ومازالة فئة قليلة كتعاني.. اليوم تنظمات جوج رحلات جوية من كازا ومراكش

اليوم وصلات فرانسا للطوطال ديال 60 رحلة جوية نظماتها باش ترحل المواطنين ديالها لبلادهم، وديجا مشات دفعة من مطار مراكش ووصلات هذي شي ساعتين، ومع الخمسة غادي تنطلق طيارة تابعة ل"إير فرونس" من مطار محمد الخامس الدولي فكازا لباريز، ومازال كاينة رحلة خرى نهار الأحد.
لحد الساعة استفدو حوالي 32000 فرنسي ومغربي بجنسية فرنسية أو عندهم الإقامة ففرانسا من هذ الرحلات اليومية اللي كتنظمهم "إير فرونس" و"ترانسافيا"، بالإضافة لرحلات خرى بحرية فباطويات كيهزو 4000 شخص، مشاو فيهم ناس جاو للمغرب بطوموبيلاتهم أو بالكرفانات، وماكانش يصلاح ليهم يرجعو فالرحلات الجوية بسباب هذشي، لكن واخا هكذاك، مازال الآلاف للآن كيتسناو الدور ديالهم، فيهم ناس كبار ومراض، وكاين اللي مابقى عندو باش يعيش، لكن هذو كيشكلو غير فئة قليلة.
والقنصليات الفرنسية فالمغرب سهلات على العالقين المأمورية باش يستفدو من هذ الرحلات، كيخصهم غير يعمرو واحد الفورميلير بجميع المعلومات المتعلقة بيهم، فيه المكان اللي كيتواجدو فيه ورقم الباسبور، ومن بعد كيخصهم يردو البال لتيليفوناتهم وينتظرو اتصال شركة الطيران بيهم، ومنين كيكونفيرميو ليها رغبتهم فالرجوع كتحدد معاهم تاريخ الرحلة المقبلة وكيخلصو البيي، قبل ما تتكلف بنقلهم فالطرونسبور لمطار محمد الخامس فكازا أو لمطار مراكش بالنسبة للي حاصلين فالجنوب.