حصلت "كود" على معطيات خاصة حول الأسباب التي دفعت بالنائبة البرلمانية وفاء البقالي بالهجوم على القيادي البارز في صفوف حزب التجمع الوطني للأحرار، مصطفى بيتاس، بعدما بغات تبين أنها كتدافع على وزير الاقتصاد والمالية وإصلاح الإدارة محمد بنشعبون. هادي أيام قليلة كان مصطفى بيتاس انتقد وزير المالية بنشعبون بسبب شي أمور عندها علاقة بقانون المالية التعديلي. كولشي هنا مزيان. داك البرلمانية البقالي نقزات من بلاصتها كفي العادة ودارت تدوينات كتهاجم فيها بيتاس باش تتلصق على الوزير بنشعبون لكن علاش دارت هادشي؟ علاش هاجمات بايتاس باش تتملق لوزير المالية؟. وحسب مصدر "كود"، فإن هاد البرلمانية اللّي كانت تطردات من أحزاب كثيرة من بينها البام، ناضت تدافع على الوزير بنشعبون حقاش يعتبر رئيسها المباشر فالخدمة. مصدر "كود" كشف أن هاد البرلمانية كتخدم فمديرية الضرائب بفاس وهادي مدة وهي لاصقة مسؤولين كبار فمديرية الضرائب والمالية على شي تخربيق ديالها. المهم من هادشي كولو. يقول مصدر "كود" هاد البرلمانية عندها مصالح خاصة وهادشي علاش بغات تبيّن لوزير المالية بأنها جات من جيهتو ضد مصطفى بيتاس اللي بعيد هو على المشاكل ومعمرو ادخل فشي صراعات مع البرلمانيين ديال "الحمامة"، لكن هاد البرلمانية ديما منوضة ليهوم الصداع فالفريق وكانت دخلات فحرب مع الرئيس ديالها فالفريق توفيق كاميل. هاد البرلمانية كانو أحزاب كثيرة طلبو منها تمشي فحالها. حقاش السيدة ديما منوضة ليهوم الصداعات وكتلاقي السلوكة بين السياسيين وكتبقا تفرج فالتالي. دبا حسب مصدر "كود" كولشي عارفها فالفريق وكولشي مبعد عليها. هاد البرلمانية كانت نجحات فاللائحة الوطنية ففاس ومضربت لا تمارة لا والو. معروف شكون ضرب تمارة باش نجحات. هي لقاتها واجدة. دبا عارفة راسها مغاديش ترجع تطلع برلمانية ناضت تهاجم بيتاس باش تقضي شغالها من وزير المالية. لكن الوزير بنشعبون معندوش مع هادشي وعارف كولشي ومغاديش يدخل راسو فهاد التخربيق.
