حطوها اليوم فالبلدية.. مواطنون دارو عريضة رافضة للوكَو أكَادير الجديد – وثيقة

حطات لجنة عريضة عدم القبول للهوية البصرية الجديدة لمدينة أكَادير "اللوكَو"، العريضة اللي دارت لدى مكتب الضبط بالقصر البلدي بأكَادير، اليوم الخميس، واللي كتحمل 230 توقيع، كتطالب فيها ب"إيقاف اعتماد الهوية البصرية الجديدة للمدينة".
وعلنات اللجنة، فبلاغ ليها، أن العريضة مستوفية لجميع الشروط الجاري بها العمل والمنصوص عليها في القانون التنظيمي للجماعات الترابية فالباب ديالو السادس، اللي كيحدد شروط تقديم العرائض من قبل والمواطنين والجمعيات، وتحديدا فالمواد 121، 122، 123، و124.
وفمقدمة العريضة، اللي رافقها طلب موجه لرئيس المجلس الجماعي لأكَادير، قالو أعضاءها أن الهوية البصرية ديال مدينة أكَادير خاصها تعكس المؤهلات الحضارية والثقافية والاقتصادية للمدينة،فضلا عن ضرورة استحضار البعد التاريخي للمدينة، عبر إشراك الساكنة في إعداد وتصميم هذ الهوية البصرية، وترسيخ مبدأ التشاور قبل اتخاذالقرارات، حفاظا على هوية المدينة.
وكان ناض صداع كبير على اللوكَو اللي اعتمداتو جماعة أكَادير، وعبرو نشطاء كثار على رفضهم ليه، على اعتبار أنه كيغيب الهوية الثقافية ديال المدينة وشافو بأنه كيفتقر للمهنية ولأدنى شروط الإبداع.
وبعض النشطاء اعتبرو أن اللوكَو منقول، طيكسطو، من الهوية البصرية ديال القاهرة، بحيث تم اعتماد شكل المثلث فالديزاين ديالو، تماما كيف معمول فلوكَو العاصمة المصرية، ولو أن استعمال المثلث عند المصريين طبيعي بحكم رمزيتو للأهرامات، أما بالنسبة لسواسة فماعندو حتى معنى ثقافي أو حضاري.