لمغاربة اللي جسدهم معانا وعقلهم مع قطر ومع تركيا كيعيشو ساعات قاصحة. البارح خرج بلاغ للديوان الملكي وفيه ان الامارات قررات تفتح قنصلية فالعيون وصحاب قطروتركيا ضاربين الطم. هاد العينة من لمغاربة كانو ناشطين بزاف مؤخرا. لقاو دعوة حبيبهم وسلطانهم اردوگان بمقاطعة المنتجات الفرنسية بسباب رسومات كاريكاتورية على النبي محمد٬ فرصة للتعبير ماشي غير على دعمهم بل لنقل معركة رئيس تركيا اللي اساسها سياسي ماشي ديني٬ للمغرب. طبعا هادو لقاو هاد الحملة اللي شاركات فيها قطر مزيان فرصة يهاجمو كاع اللي ما تبعش السلطان اردوغان. كثار من هادو من الاسلاميين خاصة العدل والاحسان والعدالة والتنمية. قبل هاد الشي كانو هاجمو بزاف الامارات العربية المتحدة بعد اعلانها التطبيع مع اسرائيل وتبادل السفراء واطلاق رحلات مباشرة. الغريب ان الاتراك عندهم علاقات ديبلوماسية مع تركيا وعندهم تعاون كبير وعندهم خط مباشر. ما عمر هاد الاسلاميين هدرو عليه. نهار دارتو الامارات ناضو ليها. البارح مع اعلان الامارات بعد اتصال هاتفي بين الملك محمد السادس ورجل ابو ظبي القوي محمد بن زايد٬ عن قرار الامارات فتح قنصلية لها فالعيون٬ دخلو هاد صحاب اردوغان وقطر لجحورهم. ضربو الطم. عايشين ساعات قاصحة. غبرو من وسائل التواصل الاجتماعي. هما قادرين يفضلو تركياوقطر على المغرب غير فقضية الصحرا عارفين قيمتها عند لمغاربة. اذن ختارو يسكتو
