البرلمانية مراس فضحات الوزير آيت الطالب فالبرلمان: كريتي مقر مديرية الموارد البشرية ب30 مليون فالشهر.. وشكون خدا صفقة إصلاح المقر القديم

النائبة البرلمانية ابتسام مراس، عضو الفريق الإشتراكي بمجلس النواب، فضحات وزير الصحة خالد آيت الطالب. الاتحادية أكدت أن الوزير أقدم مؤخرا على اكتراء بناية جديدة لمديرية الموراد البشرية لوزارة الصحة بحي أكدال.
اكتراء هاد البناية، حسب البرلمانية مراس اللّي كانت كتهضر في مناقشة الميزانية الفرعية لوزارة الصحة بلجنة القطاعات الاجتماعية، داز بسومة كرائية القيمة ديالها وصلات ل300 ألف درهم أي 30 مليون سنتيم شهرياً.
مراس تسائلت وسط أشغال اللجنة قائلة: "واش الظرفية مناسبة لنقل مقر الموارد البشرية لوزارة الصحة إلى بناية بأكدال، ثمن كرائها 300 ألف درهم للشهر، وشكون كيقوم بإصلاح المقر القديم لمديرية الموارد البشرية لوزارة الصحة؟".
بعض المصادر كتقول ان هاد الصفقة فيها الريحة ديال "باك صاحبي"، وان سيدة مقربة من الوزير ايت الطالب هي اللّي فازت بصفقة إصلاح وتهيئة المقر الجديد لمديرية الموارد البشرية.