نحمدو الله كاين سيدنا. الحكومة رفضاتها والملك قررها: الڤاكسان ضد كورونا للمغاربة فابور

فضيحة كبيرة وصافي. الحكومة كانت ضد مجانية الڤاكسان ضد كورونا فيروس. بغات لمغاربة يخصلوها. بغات شعب يخلص واخا ما عندوش التغطية الصحية اللي عند البريطانيين والفرنسيين والصبليون وزيد باقي دول اوربا وامريكا. حكومات هاد الشعوب كلها قررات باللي اللقاح يكون مجاني.
دابا خاصنا نحمدوه باللي كاين سيدنا. كون بقينا بيد بنعرفة كون كلشي خلص. وزراء فحكومتو خرجو فالصحافة وقالو باللي ماشي فابور كيف قال وزير الصحة الفاشل خالد ايت الطالب. البارح كتبنا ف"كود" باللي دخل فاختصاصات رئيس الدولة. اليوم جاه الجواب. ما يبقاش يتلاح فمواضيع كبيرة عليه. وزراء خراين خرجو فالصحافة ومشاو فنفس الطريق.
الملك من خلال بيان للديوان الملكي حسم النقاش. قال باللي اصدر "تعليماته ... للحكومة قصد اعتماد مجانية التلقيح ضد وباء كوفيد 19 لفائدة جميع المغاربة"
واضاف البيان "تنبع هذه الالتفاتة الملكية .. من العناية الملكية والرعاية الإنسانية، التي ما فتئ الملك يحيط بها كافة مكونات الشعب المغربي، منذ ظهور الحالات الأولى لهذا الفيروس بالمغرب"
اكد بيان الديوان الملكي باللي غادية يكون "إطلاق عملية مكثفة للتلقيح ضد هذا الوباء في الأسابيع المقبلة. وتهدف إلى توفير اللقاح لجميع المغاربة، كوسيلة ملائمة للتحصين ضد الفيروس والتحكم في انتشاره، في أفق عودة المواطنين، تدريجيا، إن شاء الله، لممارسة حياتهم العادية، في طمأنينة وأمان"
لحد الان مازال ما كاينش شي تاريخ محدد على انطلاق العملية. كانت جلسة برئاسة رئيس الدولة ف 9 نونبر الماضي، تخصصات لاستراتيجية التلقيح ضد فيروس كورونا