إفران من ديما مدينة مبهرة من ناحية نظافتها وأمنها وجمالها ولكن راه ماشي غير بوحدها لي كيطيح فيها الثلج غير حداها كاين منطقة بويبلان وحدة من أجمل المناطق في المغرب الثلج فيها نص العام ومهمشة ومنسية

فاش كنت صغير ومن خلال التلفازة كنت كنظن أن الثلج كاين غير في إفران وأوكايمدن بوحدهم، البلايس الوحيدين لي فيهم الثلج في المغرب وكولشي كيهدر عليهم وكتبان في التلفازة، فين مايطيح الثلج كل عام كتبان غير إفران في التلفازة وكاع التقارير والربورتاجات السعيدة حول الثلج والعطلة والأطفال السعداء والمدينة الزوينة النقية راه كتكون غير من إفران وميشليفن، هاد اليوماين أنا نيت مشيت لإفران ولقيت فيها الثلج وعامرة بالزوار والقضية مروجة والمدينة كيف ديما نقية بزاف وآمنة بزاف، الطريق بين إفران وميشليفن كلها مخزن فين مكاين شي تجمع ديال الطوموبيلات كاين حداهم الجدارمية حاضيينهم وكينضمو المرور، ولي كيوقف جيهة الغابة المسيجة ويبغي يدخل ليها كيعلموه بلي ممنوع وخطيرة، وسط داك البرد والثلج كان رجال واقفين ومراقبين وكيصهرو باش يدوز الزيارة ديال أي واحد مشا لتم آمنة وفي ظروف مزيانة.
إفران من ديما مدينة مبهرة من ناحية نظافتها وأمنها، ولكن للأسف كاين تركيز مبالغ فيه على هاد المدينة علما أنه كاين مناطق أخرى لا تقل عليها جمالا، العام لي فات أول مرة كنعرف أن الثلج كيطيح غير نواحي تازة، طلعت صدفة لمنتزه تازكا وماديتش حتى الحوايج ديال الثلج غادي غير زعمة نكتاشف الغابة والدنيا تما، غير فت راس لما شوية وأنا نلقى الثلج جنب الطريق شديت طريق مغراوة بحال الى غادي لبويبلان مشيت حتى لنص الطريق ولقيتها مسدودة بالثلج، تما شفت طبيعة أول مرة نشوفها بداك الجمال وبداك الإمتداد البصري، رجعت لباب بودير لقيت مدفون بالثلج ودزت من الغابة ديال تازكا وهبطت على بوشفاعة، منطقة من أجمل المناطق في المغرب عمري سمعت عليها شي حاجة أو بانت في التلفازة من غير الى شي سارح مسكين مات بالثلج، أما كمنطقة عندها مؤهلات سياحية كبيرة وفيها فين تمشي وفيها مايتشاف هادي عمرك تسمعها ، من غير شي مبادرات فردية ديال صفحات في الفايسبوك لي كيعرفو بمثل هاد المناطق المظلومة إعلاميا.
جبل بويبلان كانت فيه أول محطة تزلج في المغرب داروها الفرانسيس راها تخربات دابا بالإهمال والنسيان، الثلج كيكون فيه نص العام، ماتحتاجش تشد الطريق كتجري باش تلقاه، الطبيعة والغابة والمناظر وأي حاجة يبغيها الواحد في الطبيعة كاينة فيه، ولكن للأسف المنطقة كلها منسية ماشي غير الجبل، راهم بعد المرات كيتعزلو على العالم بالشهورة بقوة الثلج، مدينة هرمومو أو رباط الخير أقرب مدينة لبويبلان مهمشة ومنسية عشرات السنين هادي، علما ان عندها مؤهلات كثيرة لأنه السياحة في المنطقة ماشي غير ديال الشتا والثلج بل ديال كاع الفصول خاص غير التنمية الحقيقية والطريق تقاد وأماكن المبيت يكثرو ويتم الترويج للمنطقة، راه كاين غير جمعيات صغيرة وغير من خلال المواقع والفايسبوك قدرو يروجو للمناطق ديالهم ويروجو فيهم القضية، راه الى قامت الدولة بترويج لبويبلان المغرب كامل غادي يعرف بلي راه الثلج مكاينش غير في إفران وصافي.