أرقام كتصدم. تقرير رئاسة النيابة العامة ل2019: تسجلات 19019 قضية عنف ف2019.. و100 فالمية من جرائم القتل العمد مرتكبينها الذكور

كشفات رئاسة النيابة العامة، فتقريرها لسنة 2019 حول تنفيذ السياسة الجنائية وسير النيابة العامة، ارتفاع قضايا العنف ضد النساء ب11 فالمية بالمقارنة مع 2018، بعد تسجيل 19019 قضية فالطوطال، واللي كتبان بشكل كبير فالجنح والجنايات الواردة فالقانون رقم 103.13 المتعلق بمحاربة العنف ضد النساء، بحيث عرفت جنحة الطرد من بيت الزوجية تسجيل 629 قضية، بزيادة ديال 74 فالمية بالمقارنة مع 2018، وجنحة التحرش فالفضاء العام كذلك تزادت ب370 حالة كثر من 2018.
وشكلات الجرائم اللي عاد تحدثات فالقانون المذكور نسبة 16,38 فالمية، بينما شكلات قضايا العنف الجسدي 48 فالمية بمجموع 9145 قضية، والعنف الجنسي 10 فالمية، بينما العنف الاقتصادي 29 فالمية.
وكيبقاو عدد المتابعين الذكور، منهم الراشدين والأحداث فقضايا العنف ضد النساء، أكبر من غيرهم، بحيث 19363 واحد متابع فيهم، أي بنسبة 95,1 فالمية، بينما غير 988 من الإناث اللي متابعين فهذ القضية، بنسبة 4,9 فالمية، وفهذ الحالة، غالبا كتكون مشاركة مع الذكور، و100 فالمية من جرائم القتل العمد مرتكبينها الذكور،حسب ما جاء فالتقرير.
وكيحتل الزوج المرتبة الأولى فعدد الجرائم المرتكبة فحق المرأة، إذ تمت متابعة 11,563 شخص، بما يشكل نسبة 56,82 فالمية من مجموع الأشخاص المتابعين.
وفالمرتبة الثانية كيجي الغير، اللي كيقول التقرير ان الجرائم اللي كيدير هي الأكثر خطورةد بحيث 939 منهم متابعين بجريمة الاغتصاب، و58 بجناية الضرب المفضي إلى الموت دون نية إحداثه.