تقرير النيابة العامة ف2019: 6172 طفل تعرضو للعنف والاعتداء.. و23,19 فالمية من عند عائلتهم

علنات رئاسة النيابة العامة أن عدد قضايا العنف ضد الأطفال وصل ل5650 قضية، وعدد الضحايا 6172 فالمجموع، ومتابعين فهذ القضايا 6291 واحد، منهم 92 فالمية ذكور.
وحسب تقريرها لسنة 2019 حول تنفيذ السياسة الجنائية وسير النيابة العامة، فهدد قضايا العنف ضد الاطفال عرفات انخفاض نسبي ب15,69 فالمية، مما يؤشر على منحى إيجابي يحفز على المضي قدما لتطويق هذ النوع من العنف، كيف قالت رئاسة النيابة العامة.
وهاذ الانخفاض كاين بالأساس فقضايا الاغتصاب بنسبة 51,6 فالمية، وهتك العرض بالعنف بنسبة 22 فالمية، وهتك العرض بدون عنف بنسبة 16,17 فالمية.
بالنسبة للمتابعين بجرائم العنف ضد الأطفال حسب قربهم من الضحايا، فالاغيار كيشكلو 76,3 فالمية، بينما الآباء والأمهات والإخوة والإخوة والزوج كيشكلو 23,19 فالمية، وفمقدمتهم كيجيو الآباء بنسبة 89,17 فالمية، ثم الأمهات ب6,51 فالمية.
واعتبر التقرير أن الاعتداءات الجنسية من طرف الأب كاينة بنسبة 2,6 فالمية، وواخا هذ النسبة ضعيفة، إلى انها كتشكل خطورة بالغة بالنسبة للتقرير.
ومن الملاحظ أن الضحايا الإناث كيفوقو الضحايا الذكور بنسبة قليلة (58 فالمية إناث و42 ذكور)، بينما كاين ارتفاع فعدد الضحايا الإناث فاش كيتعلق الأمر بالاعتداء الجنسي (1912 إناث مقابل 493 ذكور).
وف2019 كاين تراجع فالتدابير المتخذة لحماية الاطفال ضحايا الجرائم، بحيث كانت ف2018 4480 ديال التدابير وف2019 كانت 1229.
بالنسبة للجرائم المرتكبة من طرف الأطفال في نزاع مع القانون كتتحدد ف 24204 قضية، وبلغ مجموع المتهمين 27231 طفل، 91,6 فالمية منهم ذكور، و0,36 فالمية منهم أجانب.
وفأغلب الاحيان فسنة 2019، من التدابير اللي كتخاد فحق هذ الاطفال التسليم للعائلة (13718 حالة) والإيداع بمؤسسة لحماية الطفولة (2990)، ثم الإيداع بالمؤسسات السجنية (2490)، والوضع تحت نظام الحرية المحروسة (2482).