خبار زوين.. الوزارة قررات تعوض على دوايات مشاكل الإنجاب.. وأطباء التوليد: هذا قرار مزيان حيت بزاف ديال الكوبلات كيحلمو يولدو ولكن وضعيتهم المادية ماكتسمحشلهم يشريو الدوا – فيديو

على هامش القرار اللي اتخذاتو وزارة الصحة مؤخرا، القاضي بالتعويض بنسبة 40 فالمية عن الأدوية اللي كتعالج تأخر الإنجاب والعقم، نظمات الجمعية المغربية لطب الإنجاب وطب المولود ندوة للتعريف بأبعاد هذ القرار.
الندوة اللي تدارت البارح الخميس فكازا جات كذلك من أجل توعية الفئات المعنية بأنه بإمكانهم يتعوضو على أدوية المشاكل الإنجابية من دابا لفوق، خصوصا وأن 12 فالمية من الأزواج كيعانيو من صعوبة فالإنجاب، ومنهم نسبة كبيرة من الطبقة الهشة واللي فوضعية مادية صعيبة، كيف قالوا المتدخلين.
وفهذ الصدد قال عمر الصفريوي، رئيس الجمعية المغربية لطب الإنجاب وطب المولود، والأخصائي فأمراض النساء والتوليد وعلاج العقم، أن المغاربة ماعارفينش بللي كاينين علاجات، وحتى اللي عارفين كاين فئة كبيرة منهم مافحالهمش، خصوصا وأن بعض الأدوية ثمنها شوية غالي.
وزاد أن هذ الخطوة إيجابية، وكتمثل ثمرة ديال النضال دالجمعية من وقت كويل، لكنها فالمقابل رمزية وماكافياش، ومازال غيخص ضمان التعويض على سبل العلاج الأخرى، من فحوصات وسكانير وتحاليل مصاحبة والتلقيح للمساعدة على الإنجاب أو تقنية الأنابيب أو غيرها.
وتكلم الصفريوي حتى على مشاكل خرى كيتسبب فيها عدم إنجاب الحالمين بالأبوة والامومة، بحال الاكتئاب ونقص تقدير الذات، خصوصا وان بعض الرجال كيعتبرو راسهم إلى ماكانوش كيولدو ماشي رجال، وكذلك النساء، و"وهذشي ماعندو علاقة لا بالرجولة لا بالأنوثة، هذو مشاكل كاينة أدوية كتعالجهم، وخاص الناس تعرف هذشي"، على حساب قولو.
من جهتو، قال سعيد لزرق، رئيس جمعية أطباء أمراض النساء والتوليد بالقطاع الخاص، أن هذ القرار إيجابي بزاف، وممكن يبدل بزاف ديال الأمور، حيت هو اعتراف ضمني من وزارة الصحة بأن صعوبة الإنجاب والعقم هي أمراض لازم تتعالج، وعند الناس كل الحق فعلاجها، وهذا مكسب على حد قولو.
وأكد أن هذ القرار يقدر يدخل على الأزواج الفرحة، ويخليهم يقتربو من تحقيق حلمهم فالإنجاب، كيف غيساهم فأن الاطباء يخدمو بإرياحية كثر وفظروف مزيانة على قبل، من بعد ما يتمكنو المرضى من الأدوية الفعالة اللي كاينة ومايضربوش حساب لثمنها بحال قبل.
بدورها، قالت عزيزة غلام، رئيسة الجمعية المغربية للحالمين بالأمومة والأبوة، أن هذ القرار هو خبر جد سار بالنسبة للجمعية، لكونو جا "من بعد مسيرة دالنضال، والصبر ديال الازواج في وضعية ضعف الخصوبة، وجا ايضا بعد مجموعة من الاستشارات واللقاءات"
وأكدات أن هذي ماشي آخر محطة، حيت خاص حسبها تكون تغطية صحية شاملة كتعم جميع التشخيصات ومختلف الفحوصات اللي الكلفة ديالها مرتفعة، وأن هذي عاد بداية المعركة، على حساب كلامها.
وهذا فيديو عن الندوة اللي كانت اليوم وتصريحات الأطباء ل"كود" فيها تفاصيل كثر: