واش كيتسناو هاذ المغتصب يجي على خاطرو من بلادو؟. مسلسل محاكمة البيدوفيل الكويتي قدام استئنافية مراكش باقي طويل.. المحكمة أجلات القضية للمرة 11

علمت "كَود"، أن غرفة الجنايات الابتدائية بمحكمة الاستئناف بمراكش أجلات مؤخرا للمرة 11 محاكمة البيدوفيل الكويتي اللي اغتصب درية صغيرة وفض بكارتها إلى 23 مارس الجاي والسبب ديما هو غياب المتهم وهاذ الأمر غادي يفرض على المحكمة تاخذ إجراءات جديدة تقدر تغير مسار القضية.
هاذ خونا كان تكرفس على بنت كانت كتخرج تسهر معاه فلبواط و الديسكوتيك فمراكش ومارس عليها الجنس بالإكراه وتسبب ليها في فض البكارة وكان بغا يسكتها بشي ريالات. لكن من بعد القضية كبرات وتشد بتهمة "التغرير بقاصر واغتصابها واستغلالها جنسيا وتصويرها".
لكن المثير في هاد الضوصي، هو أن المحكمة قررت متابعته في حالة سراح مؤقت، ومباشرة بعدها هرب المجرم لبلادو رغم الضمانات الكتابية التي قدمتها سفارة الكويت لهيئة المحكمة، مما تسبب في حالة سخط واستياء لدى جمعيات المجتمع المدني المحلي بمراكش.