تخلطات بكراع الكلب. البرلمانية والقيادية في نقابة الصحافيين رحاب: مدير موقع واكل لصحافيين رزقهم وعاد كيطلب منهم الفلوس وكيبزز عليهم يديرو ليه الإشهار

عبرات حنان رحاب، البرلمانية عن حزب الاتحاد الاشتراكي والعضوة فالنقابة الوطنية للصحافة المغربية، على استغرابها من سماع قصة مدير موقع إلكتروني إخباري، واكل الصحافيين فرزقهم وكيبزز عليهم يديرو ليه الإشهار وعاد كياخد عليه منهم مقابل مالي.
وشرحات رحاب، فتدوينة ليها فحسابها على فيسبوك، هذ الخروقات اللي داير هذ السيد، بحيث كيطلب من الصحافيين والمصورين الفلوس مقابل أنهم يحصلو على ميكرو فيه لوكَو الموقع، وكيبيع ليهم تيشورتات وكاسكيطات فيهم اللوكَو، وكيطلب منهم بدورهم يبيعوها للناس.
وزادت رحاب، مستغربة فالتدوينة نفسها، أن السيد وصل بيه الحد يطلب من الصحافيين أداء 1000 درهم سنويا باش يحصلو على بطاقة الاشتغال فالموقع.
وفوق هذشي كامل، كتقول رحاب أن هذ كَاع الناس اللي خدامين مع هذ السيد ماكياخدو حتى أجر على العمل ديالهم.
وختمات حنان رحاب تدوينها بالقول: "الحاصول.. تخلطات بكراع..."، نسبة للمثل الشعبي الدارج اللي كيقول "تخلطات بكراع الكلب"، واللي قصدات بيه أن الدومين ترون وتخلط، ومابقينا نعرفو الصحافي من البزناس.
https://m.facebook.com/story.php?story_fbid=10224506364556555&id=1530934088&ref=content_filter