اعتبرو فهذشي سرقة وتزوير لتاريخ المغرب.. مسلسل "فتح الأندلس" منوض الصداع بسباب "تحريف" هوية طارق بن زياد وطمس أصلو المغربية

ضجة كبيرة على مواقع التواصل الاجتماعي بسبب المسلسل الخليجي "فتح الأندلس" اللي غيدوز فرمضان، وكيتصور فلبنان وتركيا، وغيشارك فيه الممثل المغربي هشام بهلول، بسبب تزويرو لتاريخ المغرب، من خلال عرض شخصية طارق بن زياد بأصل عربي إسلامي، فضرب للهوية المغربية الأمازيغية.
لاباج ديال "عظماء المور المغاربة" تطرقات لهذشي، وقالت أن هذ الناس جردو طارق بن زياد من الجنسية المغربية، ورجعوه مسلم فقط، فمحاولة لإسكات أفواه المغاربة باللعب على وتر الدين، و"إرضاء الجزائريين لي دايرين حملة واسعة فتويتر ومواقع التواصل الإجتماعي لسرقة هاد الشخصية المحورية فتاريخ المغرب"، كيف قالت الصفحة.
واعتبرات الصفحة أن هذشي خطير، كيف تساءلات كيفاش وزير الثقافة، عثمان الفردوس، ماخرج بحتى بيان استنكاري فالموضوع.
https://m.facebook.com/story.php?story_fbid=454014096018427&id=103631701056670
وحاولات تتواصل مع المخرج الخليجي محمد العنزي على "تويتر"، باش تستفسرو على هذ الفضيحة، والمراجع اللي تم الاعتماد عليها فكتابة سيناريو المسلسل، ولو بذكر مرجع واحد، لكن المخرج تجاهل الميساجات وماردش.
وكتقول الصفحة، فبيبليكاسبون ليها عرضات فيها كونفيرساسيون الأدمين ديالها مع المخرج: "الرد تاع هاد المخرج الخليجي أنه اعتامد على الكثير من المراجع وطلبت منو يعطيني إسم لمرجع واحد! بما فيه المرجع لعتامد عليه فتجسيد شخصية شداد لغيمثلها السي هشام بهلول ، مع العلم أنه مكين تا مرجع تاريخي كتحدث على أنه كانت شي شخصية مع طارق بن زياد بإسم شداد، أي أنها شخصية خرافية، طبعا هاد المخرج الخليجي قرا جميع الرسائل تاعي وتجاهل الرد مما يعني، أن المراجع لعتامدو عليها هي ويكيبيديا والقصص المنحولة ديال قال فلان و فلان".